Oliy ligada 12-tur o‘yinlari poyoniga yetdi.
“Navbahor” o‘z uyida Toshkentning “Bunyodkor” jamoasini qabul qildi. Jangovor ruhda o‘tgan qarama-qarshilikda g‘olib aniqlanmadi. “Lochinlar”ning chempionatda qatorasiga to‘rtinchi bahsda ham durang qayd etishdi.
Birinchi bo‘lim “navbahorchilar” ustunligida o‘tdi. Jamoalar darvozalar oldida xavfli vaziyatlarning aksariyatini standart vaziyatlar orqali sodir etishganini ta’kidlash lozim. Burchak va jarima to‘plarini Murod Zuxurov mushtlari bilan har safar qaytarishga muvaffaq bo‘ldi. O‘yinning birinchi yarmida Tohir Shamsitdinov, Timur Tolipov va Aziz Turg‘unboyevning faolligi toshkentliklar himoyachilarga tashvish keltirib turdi. Ammo tanaffusgacha darvozalar daxlsizligi saqlanib qoldi.
Ikkinchi taym ham Ilhom Mo‘minjonov shogirdlari ustunligida o‘tdi deyish mumkin. Oliy ligada ketma-ket uchta durangdan so‘ng o‘z maydonida g‘alabani maqsad qilgan “Navbahor” katta kuch bilan bosim uyushtirib bordi. Biroq, hisobni ochish “Bunyodkor”ga nasib etdi. 67- daqiqada himoyachilarning orasidan o‘tib ketgan Doston Hamdamov o‘z niyatiga yetdi va gol urdi, 0:1.
Shundan so‘ng joriy mavsumda o‘z uyida yutqazmay kelayotgan “Navbahor” ushbu an’anani davom ettirish uchun bor kuchini sarflashga o‘tdi. O‘yinni kuchaytiish maqsadida zaxiradan maydonga tushirilgan Mansur Saidov bir necha vaziyatlarda qahramonlik ko‘rsatishga yaqin keldi. Lekin yarimhimoyachiga “Bunyodkor” himoyachilari xalal berishdi.
82- daqiqaga kelib, Dilshod Jabborov o‘yinda burilish yasadi. Jamoa sardori o‘zi ishlagan jarima to‘pini ajoyib tarzda Zuxurov darvozasiga joylab qo‘ydi - 1:1. Ikkinchi bo‘limga qo‘shib berilgan vaqtda Yovanovich gol muallifiga aylanishi mumkin edi. Lekin Zuxurov muqarrar goldan poytaxtliklarni saqlab qoldi. Shu tariqa “Navbahor” qatorasiga to‘rtinchi o‘yinda durangga imzo chekdi.
Oliy liga, 12-tur
27 may. Namangan. “Markaziy” o‘yingoh. 7481 tomoshabin.
“Navbahor” – “Bunyodkor” – 1:1 (0:0)
Gollar: D. Jabborov (82) - D. Hamdamov (67).
Hakamlar: V. Seytlin – 8,5, V. Snetkov - 8,5, A. Kolinin - 8,5, O. To‘ychiboyev - 8.
Nazoratchi - B. Tog‘ayev.
"Navbahor": 30. Asilbek Amanov, 4. Abbos Otaxonov, 9. Dilshod Jabborov, 17. Ilhom Boydedayev, 21. A’zam Aliyev, 32. Jahongir Mehmonov, 33. Tohir Shamshitdinov (20. Alisher Mirzayev, 72), 44. Darko Stanoyevich, 77. Aziz Turg‘unboyev, 84. Nemanya Yovanovich, 95. Timur Talipov (10. Mansur Saidov, 54).
"Bunyodkor": 25. Murod Zuxurov, 2. Rustam Ashurmatov, 4. Akram Komilov, 8. Javlon Ibrohimov, 9. Shahzod Nurmatov (97. Javohir Esonqulov, 90+3), 10. Eldor Shomurodov (31. Mirjahon Miraxmadov, 85), 17. Doston Hamdamov, 21. Dilshod Ahmadaliyev, 28. Davron Umirov, 29. Otabek Shukurov, 44. Mirjamol Qosimov (15. Farruh Ikromov, 61).
Ogohlantirishlar: A. Otaxonov (38), M. Saidov (69) - D. Umirov (13), E. Shomurodov (28), SH. Nurmatov (38), O. Shukurov (o‘yindan so‘ng).
