Toshkentda qurilayotgan ko‘p funksional “Humo Arena” muz saroyi O‘zbekistonda ilk hashamatli sport arenasi hisoblanib, hozirda saroyda Janubiy Koreyaning Heerim Architects kompaniyasi ishchilari mexnat qilishmoqda.
 
Kelasi yilga qurilish ishlari yakunlanishi rejalashtirilgan muhtasham saroyning asosiy qismini Singapur mamlakatining yirik kompaniyalaridan biri Enter Engineering Pte. Ltd quruvchilari zimmalariga olishgan. O‘zbekistonning Wind Rose kompaniyasi qurilishni moliyalashtirish bilan birga shaxsiy investisiyasini sarflamoqda.
 
14 ming kishilik tribunaga ega ko‘p funksional saroy hududida muz arenasi, mashg‘ulotlar o‘tkaziladigan maydon, o‘quv-ko‘ngilochar bolalar xiyoboni, oilaviy ko‘ngilochar markazlar, amfiteatr, favvorali xushmanzara bog‘lar, restoran va rekrasion zonalar, bog‘ va sayilgoh, zamonaviy parking va boshqa ko‘plab inshootlar joylashadi.
 
Binoning umumiy maydoni 74 ming kvadrat metrni tashkil qiladi, bino 4 qavatdan iborat bo‘lib, balandligi 36 metr. Muz saroyi 12,5 ming tribunalarga ega bo‘lib, konsert zali sifatida 10 ming, sport musobaqalar o‘tkazish zali sifatida esa 14 ming tomoshabinga mo‘ljallangan.
 
Majmua hududida sport muzeyi, bolalar uchun yopiq o‘yingoh, trenajer zallari, fitnes markazi, zamonaviy tipdagi umumovqatlanish shoxobchalari, sport anjomlari do‘koni va boshqa xizmat ko‘rsatish ob’ektlari joylashtiriladi.
 
Arenada xokkey matchlari, short-trek, figurali uchish, kyorling bo‘yicha musobaqalar bilan bir qatorda basketbol, voleybol, gandbol, futzal, boks, taekvondo va boshqa sport turlari bo‘yicha bellashuvlar o‘tkazish imkoniyati bor.
 
Ta’kidlab o‘tish joizki, Janubiy Koreyaning Heerim Architects kompaniyasi Islom Karimov nomidagi Toshkent xalqaro aeroportining dizayn ishlarini ham o‘z bo‘yniga olgan. Ma’lum bo‘lishicha, ushbu loyihaning umumiy qiymati $430 milliondan ortiq mablag‘ni tashkil qiladi.