Ostona shahridagi boks bo‘yicha Qozog‘iston prezidenti kubogi uchun V xalqaro turnirda mezbonlardan tashqari O‘zbekiston, Janubiy Koreya, Hindiston, Rossiya, Filippin, Ukraina, Qirg‘iziston, Tojikiston, Mo‘g‘uliston va Erondan kelgan bokschilar g‘oliblik uchun kuch sinashmoqda.

O‘zbekiston terma jamoasi murabbiylari bu musobaqaga iste’dodli yosh bokschilarni jalb etdi.

Qozog‘istondagi turnirning dastlabki uchrashuvlarida vazni 91 kilogrammdan ortiq bokschilar bahsida qatnashayotgan hamyurtimiz Rustam Ismoilov mezbonlar vakili Nurjan Bekzatovni 3:2 hisobida mag‘lubiyatga uchratib, keyingi davraga yo‘llanma oldi.

60 kilogramm vazn toifasidagi bahslarda Sulaymon Latipov qozog‘istonlik bokschi Rustam Rustamovni katta ustunlik bilan yengdi.

Afsuski, dastlabki bosqichda bokschilarimizning aksariyati mezbonlar vakillariga imkoniyatni boy berdi. Xususan, Nodirjon Mirzahmedov, Abdulhay Shorahmatov, Ulug‘bek Komilov, Mahmud G‘oipov, Mirzobek Hasanov musobaqadagi ishtirokini erta yakunladi.

Qizlar musobaqasida Tursunoy Rahimova, Yodgoroy Mirzayeva hamda Nafisa Asqarova ham mag‘lubiyatini tan oldi.

Yana uch nafar bokschimiz - Abrorjon Qodirov, Bobo-Usmon Boturov va Kozim Mardonov bahslarga endi qo‘shilmoqda.