AQSHning Alyaska shtatida Robert Spurr xotirasiga bag‘ishlangan an’anaviy marafonda fojia yuz berdi.
Ushbu musobaqa marshruti o‘ziga xos bo‘lib, qisman o‘rmonni kesib o‘tadi va tog‘ tepasida yakuniga yetadi. Fojia aynan o‘rmon ichidan o‘tadigan yo‘lda sodir bo‘lgan va unda qo‘ng‘ir ayiq 16 yashar ishtirokchini g‘ajib tashlagan.
Yigit musobaqa paytida o‘z yaqinlariga SMS jo‘natib, uni ayiq quvlab kelayotganini yozgan. Shundan so‘ng, uning oilasi tashkilotchilarni bu haqda ogohlantirgan.
Zudlik bilan qutqaruv-qidiruv ishlari tashkil qilingan bo‘lishiga qaramasdan, fojianing oldini olish iloji bo‘lmagan. Afsuski qutqaruvchilar voqea joyiga kech yetib borishgan va yigitning g‘ajib tashlangan murdasini topishgan xolos.
Endi odamxo‘r ayiq ovchilar tomonidan qidirib topilishi va o‘ldirilishi kerak.
