Bugun, 21 iyun kuni poytaxtimizdagi Xalqaro Press-klubda sport olami, mamlakatimizda sportni rivojlantirish, Olimpiya harakati va xususan futbol mavzusiga bag‘ishlangan anjuman bo‘lib o‘tdi. Unda O‘zbekiston futbol federasiyasi vise-prezidenti Sardor Rahmatullayev ishtirok etib, o‘z fikrlarini bildirib o‘tdi.

"Tan olish kerak, O‘zbekiston milliy terma jamoasidan xatolar o‘tdi. Lekin bizda JCH yo‘llanmasini to‘g‘ridan-to‘g‘ri qo‘lga kiritish uchun imkoniyat saqlanib turibdi. JCH-2018 yo‘llanmasiga ega bo‘lish uchun oldimizda 2ta o‘yin turibdi. Hozirda terma jamoalar murabbiylar shtabi va O‘FF rahbariyati muxlislar orzusini amalga oshirish uchun barcha ishni qilmoqda. O‘zbekiston futbol federasiyasi ijroqo‘m byurosi Samvel Babayan boshchiligidagi murabbiylar shtabiga qolgan 2ta o‘yinda imkoniyat berish haqida qaror qabul qildi. Ushbu bayonotni e’lon qildik.

Sentyabr oyida O‘FFning hisobot-saylov konferensiyasi bo‘lib o‘tadi. Unda Federasiyaning yangi rahbariyati, yangi ish rejasi tasdiqlanadi. Yangi rahbariyat mamlakatda futbolni rivojlantirish uchun yangi uslubda ish olib boradi.

Yana shuni alohida ta’kidlashim kerak, O‘FF rahbariyati terma jamoaning natijalari bo‘yicha mas’uliyatni o‘z zimmasiga oladi", — dedi Rahmatullayev.