21 iyun kuni Xalqaro Press-klubning navbatdagi anjumani o‘tkazildi.
“O‘zbekistonda sport: yangi vazifalar, Olimpiya harakati va sog‘lom turmush tarzi” mavzusidagi anjumanda sportimizda mavjud vaziyat va uni rivojlantirish, Olimpiya harakati va xususan futbol to‘g‘risida, sohaning istiqbollari, shuningdek, kelgusidagi rejalar muhokama qilindi.
Uchrashuv davomida Jismoniy tarbiya va sport davlat qo‘mitasi raisi Rustam Qurbonov, Milliy Olimpiya qo‘mitasi bosh kotibi Oybek Qosimov, O‘zbekiston Futbol Federasiyasi bosh kotibi Sardor Raxmatullayev hamda O‘zbekiston davlat jismoniy tarbiya instituti rektori Shoakram Isroilov spiker sifatida ishtirok etdi va jurnalistlarning savollariga javob berishdi.
Anjumanda O‘FF bosh kotibi Sardor Rahmatullayev Milliy terma jamoa, murabbiylarni almashtirish bo‘yicha fikr bildirdi va 2017-2020 yillarda O‘zbekistonda futbolni rivojlantirish dasturi ishlab chiqilayotganini ma’lum qildi.
«Bugun Milliy terma jamoamizning Jahon chempionatiga chiqish yo‘lidagi natijasini yaxshi deb bo‘lmaydi. To‘g‘ri, xatolar yo‘q emas, lekin bizda hali JCHga to‘g‘ridan-to‘g‘ri chiqishga imkoniyat bor. O‘zbekiston futbol federasiyasi va murabbiylar shtabi buning uchun hozirda barcha imkoniyatlarni ishga solmoqda. O‘FF murabbiylarini ishdan olish masalasiga kelsak, federasiya Ijroiya Qo‘mitasi Byurosi murabbiylar shtabiga ish va vazifani oxiriga yetkazib qo‘yish uchun imkoniyat berishga qaror qildi. Xabaringiz bor, federasiya bayonotida shu yilning sentyabr oyida konferensiya o‘tkazilishi e’lon qilingan. Qayd etish kerak, O‘FF tarkibi yangilanadi. 2017-2020 yillarga mo‘ljallangan O‘zbekistonda futbolni rivojlantirish dasturi ishlab chiqilmoqda. Unda federasiya strukturasi, rahbariyati va boshqa tashkiliy masalalarda o‘zgarishlar kutilmoqda» - dedi Rahmatullayev.
S.Rahmatullayevga futbol muxlisi tomonidan O‘FFga ishonch bildirilishining ramziy ma’nosi sifatida “Ishonch” so‘zi yozilgan pufak taqdim etildi.
