O‘zbekiston kubogi, chorak finalidan o‘rin olgan “Nasaf” – “Qo‘qon-1912” (4:1) bahsi yakunlangach, dastlab mehmonlar ustozi No‘’mon Hasanov o‘z fikrlari bilan o‘rtoqlashdi.

"Avvalombor, qarshilik muxlislarga mana shunday ko‘rkam stadion muborak bo‘lsin. O‘yin tomoshabop va chiroyli bo‘ldi. Futbolchilar ham maza qilib to‘p tepishdi. Biz  ikki xil bo‘lim guvohi bo‘ldik. Dastlabki taymda yomon o‘yin namoyish etmadik, deb o‘ylayman. Ikkinchi bo‘limda o‘yinchilarimizda charchoq alomatlari sezila boshladi. O‘zlaringizga ma’lum, birinchi davra oxiri. “Nasaf”ni esa g‘alaba bilan tabriklayman. Ikkinchi davrada ham mana shunday yaxshi o‘yinlari bilan muxlislarini xursand qilishini tilayman.

Bugungi o‘yinda kamchiliklar emas, oddiy xatolar tufayli yutqzdik. Birinchi bo‘limda “Nasaf”ga vaziyat sodir etishda imkon bermadik. Ikkinchi bo‘limda jismoniy jihatdan oqsadik. Qolaversa, ikkinchi goldan keyin futbolchilarimizda ruhiy tushkunlik ham sezila boshlandi. Baribir o‘z maydonida o‘ynayotgan jamoa kuchli harakat qiladi. Davralar oralig‘ida tarkibimizda o‘zgarish bo‘ladi. Sidorovni ortga qaytarish bo‘yicha “Paxtakor”dan xat oldik. Ribkin bilan Siddiqovni jamoada olib qolmoqchimiz.

Albatta bugungi hisob keyingi bosqich taqdirini hal qilgandek, ammo biz javob uchrashuvini o‘z maydonimizda o‘tkazamiz. Tarkibimiz kuchayadi. Yigitlarimiz Qo‘qonda doimo boshqacha o‘ynashadi. Biz oxirigacha kurashamiz", — dedi No‘’mon Hasanov.