Bugun Janubiy Koreya terma jamoasining yangi bosh murabbiyi Shin Te Yong matbuot anjumanida ishtirok etdi.

"Avvalo mana shunday qiyin vaziyatda terma jamoani menga ishonib topshirishganidan mamnunman. Albatta bu juda mas’uliyatli vazifa. Garchi hozircha JCH saralashi oxiriga qadar ishlasamda bu muhimi emas. Eng muhimi terma jamoaning JCHga chiqishidir", — deya so‘z boshladi Shin Te Yong.

Ki Song Yong ("Suonsi") va Son Xeung Min ("Tottenhem")ning jarohat olganliklari xususida to‘xtalarkan janob Shin shunday dedi: "Ular hozir davolanishmoqda. Har ikkala futbolchi bilan telefon orqali muloqot qildim. Bizda kuchli va shijoatli yosh futbolchilar ko‘p. Key-ligadagi bir necha nafarini ko‘z ostimga olib qo‘yganman. Ular istalgan vaqtda jamoani kuchaytira olishadi. O‘rtoqlik o‘yinida hammasini ko‘ramiz".

Son Xeung Min haqida alohida to‘xtalar ekan: "Son Xeung Min Angliya premer-ligasida juda kuchli o‘ynaydi. Terma jamoaga kelsa esa buning aksi. Uli Shtilike undan foydalanish yo‘lini topolmadi. Shu tomonlari ustida bosh qotiryapman", — dedi Shin Te Yong.

"Men Uli Shtilikedan butunlay farqli insonman. Terma jamoa bosh murabbiyi mamlakat futbolining gultoji deb bilaman. Qanday bo‘lmasin g‘alabaga erishish — bu mening falsafam. Eron va O‘zbekistonga qarshi juda ehtiyotkorlik bilan o‘ynash kerak. Bitta gol kiritib shuni saqlay bilish kerak. Sezib turibman ikkala o‘yinda ham 1:0 hisobida yengamiz", — deya so‘zlarini yakunladi Janubiy Koreya terma jamoasi bosh murabbiyi.

Otabek Yo‘ldoshev
Janubiy Koreya, Seul