Toshkentning «Bunyodkor» va O‘zbekiston terma jamoasi hujumchisi Eldor Shomurodov «Krasnodar»ga o‘tishi mumkin. Krasnodarliklar safini Fyodor Smolov tark etadigan bo‘lsa, uning o‘rnini 22 yoshli o‘zbek futbolchisi to‘ldiradi.

«Shomurodov – o‘zbek futbolidagi asosiy iqtidorlardan biri. O‘zbekistonda uning yuksak kelajagiga ishonishmoqda. U tez o‘sib bormoqda va yulduz darajasiga ko‘tarilishi mumkin. Shomurodovning «Krasnodar»ga o‘tishidan barcha tomonlar manfaatdor. Hozirda transferning detallari muhokama qilinmoqda. Hozirda Eldor krasnodarliklar safiga qo‘shilishga yaqin turibdi. Gap to‘laqonli transfer haqida ketmoqda», – dedi "Krasnodar" vakili.

Shumurodovning xizmatlariga avvalroq «Rubin» va «Zenit» qiziqish bildirgandi. Ular keyinchalik sotib olish sharti bilan hujumchini ijaraga olishni rejalashtirishgandi. Ammo «Bunyodkor» rahbariyatini ijara varianti qanoatlantirmadi. Shu bois, bu klublar bilan muzokaralar to‘xtab qoldi.

— «Zenit» va «Rubin» 2016/2017 mavsumning qishida Shomurodovni ijaraga olishni istagandi, — deya xabar berdi o‘zbek futbolidagi manba «Izvestiya» nashriga. — Peterburgliklar ham, qozonliklar ham futbolchiga maosh to‘lashga tayyor edi, ammo ular o‘yinchining ijarasi uchun haq to‘lashni istashmadi. Bu esa «Bunyodkor» rahbariyatini qoniqtirmadi. Shomurodovning o‘zi ham to‘laqonli shartnoma imzolashni istaydi.