Kecha, 6 iyul kuni Malavining mustaqilligiga 53 yil to‘lgani munosabati bilan o‘tkaziladigan futbol bo‘yicha o‘rtoqlik uchrashuvi oldidan yuz bergan tiqilinch oqibatida 8 kishi halok bo‘ldi.
 
Ma’lumotlarga ko‘ra, 40 ming kishi sig‘adigan “Bignu” stadionida mahalliy “Niyasa Big Bullets” va “Silver Straykers” jamoalari o‘rtasida o‘rtoqlik uchrashuvi o‘tkazilishi rejalashtirilgandi. Tashrif buyurgan muxlislarning ko‘pligi tufayli kirish yo‘lagida tiqilinch holati yuzaga kelgan.
 
Buning natijasida 8 kishi halok bo‘ldi, jumladan, ularning 7 nafari 5 yoshdan 12 yoshgacha bo‘lgan bolalar. Bundan tashqari yana 10 kishi jiddiy jarohat bilan shifoxonaga yetkazilgan. Mahalliy polisiyaning ta’kidlashicha, halok bo‘lganlar soni yana ortishi mumkin.
 
Halokat sodir bo‘lganiga qaramay, rejalashtirilgan uchrashuv o‘tkazildi, unda “Niyasa Big Bullets” jamoasi raqibi “Silver Straykers”ni 2:1 hisobida mag‘lubiyatga uchratdi.
 
Malavi prezidenti Piter Mutarika halok bo‘lganlar oila a’zolariga chuqur hamdarligini bildirib, hukumat tomonidan ularga moddiy yordam ajratishini tasdiqladi.