Birinchi davra yakuniga yetgach bir necha kun davomida dam olish imkoniga ega bo‘lgan jamoa a’zolari bugungan ikkinchi davraga tayyorgarlikni boshlab yuborishadi.

Dastlabki rejaga ko‘ra o‘quv-mashg‘ulot yig‘inini Dukentda o‘tkazish ko‘zda tutilgandi.

Lekin, oldingi rejaga o‘zgartirish kiritildi. Shu sababli futbolchilar bugundan mashg‘ulotlarga Namanganda kirishishadi.

Namangandagi yig‘in 15 iyulga qadar davom etadi. Shundan so‘ng “Navbahor” ikkinchi davraga tayyorgarlikning ikkinchi bosqichini Toshkentda davom ettiradi.

Poytaxtdagi mashg‘ulotlar 25 iyulga qadar davom etadi. Tabiiyki Toshkentdagi mashg‘ulotlar chog‘ida nazorat uchrashuvlari ham o‘tkaziladi. Ayni paytda murabbiylar to‘rtta o‘rtoqlik o‘yinida maydonga tushishni rejalashtirishgan. 

Namangandagi yig‘in davomida ham bitta nazorat o‘yini o‘tkaziladi. 14 iyul kuni futbolchilar birinchi liga vakili “O‘zDongJu” jamoasi bilan bahs olib borishadi.

Mazkur uchrashuv Namangandagi “Markaziy” o‘yingohda o‘tkazish ko‘zda tutilgan. Bugun kunning ikkinchi yarmida klub qarorgohida yig‘ilgan jamoamiz a’zolari kechki payt dastlabki mashg‘ulotda qatnashishadi.