"Navbahor"ning mashg‘ulotida bir qator yangi futbolchilar ham ishtirok etmoqda.
Bir necha kun oldin ikkinchi davrani “Navbahor”da o‘tkazishga rozilik bildirgan Abbos Maxstaliyev va Doniyor Usmonovdan tashqari yana ikki nafar futbolchi jamoa safida shug‘ullanadi.
Birinchi davrani “Olmaliq” jamoasida o‘tkazgan Murod Rajabov (07.07.1995) va birinchi liga jamoasi “Lokomotiv BFK” a’zosi Sardor Rasulov (05.09.89) shular jumlasidandir. Rajabov birinchi davra davomida asosiy tarkibda maydonga tushmagan. Murod o‘tgan mavsumda bir muddat Serbiyada ham faoliyat olib borganligini qo‘shimcha qilish joiz. Futbolchi Darko Stanoyevich to‘p surgan “Novi Pazar” klubi sharafini himoya qilgandi.
Rasulov 2016 yilgi mavsum birinchi yarmini “Sho‘rtan”da o‘tkazgach Bekobodning “Metallurg” klubiga ko‘chib o‘tgandi. Umumiy hisobda Sardor 2016 yili oliy ligada 10 ta uchrashuvda ishtirok etgan. Joriy yilgi mavsum boshida esa birinchi liga vakili Toshkentning “Lokomotiv BFK” jamoasi safida ro‘yxatdan o‘tgandi.
Agarda mashg‘ulotlar davomida ular o‘zlarini ko‘rsata olishsa “Navbahor” a’zosiga aylanishlari mumkin.
