O‘zbekiston Futbol Federasiyasi Osiyo Futbol Konfederasiyasi hamda Shveysariyaning “Empower Sports” kompaniyasi bilan hamkorlikda yangi loyihani amalga oshirish borasida shartnoma imzoladi.
Kelishuvga ko‘ra, ikkinchi davradan boshlab O‘zbekiston chempionati Oliy Liga uchrashuvlarining to‘g‘ridan-to‘g‘ri translyasiyalari “Empower Sports” kompaniyasiga tegishli Mycujoo.tv saytida, Oliy Liga klublari rasmiy saytlari, ijtimoiy tarmoqlaridagi sahifalarida bir paytning o‘zida translyasiya qilinadi.
Shu munosabat bilan 23–24 iyul kunlari Toshkentdagi Raddison Blu Hotel mehmonxonasida Oliy Liga ishtirokchi jamoalari vakillari uchun maxsus seminar-ustaxona tashkil etildi. Seminar “Empower Sports” kompaniyasi vakillari Diyego Kompaire va Daniel Portabella tomonidan olib borildi.
Unda Shveysariya kompaniyasining maxsus internet-platformasi bo‘lgan Mycujoo.tv saytida futbol o‘yinlarini qay tariqa jonli efirga uzatish borasida tushuntirish ishlari olib borildi.
Seminar yakunida O‘FF bosh kotibi Sardor Rahmatullayev so‘zga chiqib, boshlangan hamkorlik O‘zbekiston futboli rivojlanishiga katta hissa qo‘shishini ta’kidladi.
O‘zPFL bosh direktori Farhod Magametov O‘zbekistonga tashrif buyurib, o‘z mahorati bilan bo‘lishgan mehmonlarga minnatdorchilik bildirdi va esdalik sovg‘alarini topshirdi.
