«Chelsi» klubi yarimhimoyachisi Robert Kenedining qilig‘i uchun Xitoy xalqidan uzr so‘radi.

The Telegraph xabariga ko‘ra, 21 yoshli futbolchi jamoasi bilan Xitoyga tashrif buyurganida, ish joyida uxlab qolgan xitoylik qo‘riqchi fotosuratini instagramga joylashtirib, irqiy kamsituvchi ruhdagi gaplarni yozgan. Shundan so‘ng, «Arsenal»ga qarshi bo‘lib o‘tgan o‘rtoqlik uchrashuvi vaqtida mahalliy muxlislarning hushtakbozligiga uchragan.

«Chelsi» futbol klubi Xitoy xalqidan futbolchining ijtimoiy tarmoqdagi haqoratomuz posti uchun rasman uzr so‘radi.

«22 iyul kuni klub xitoylik muxlislar tomonidan iliq va do‘stona qarshi olindi. Ammo biz yosh futbolchilarimizdan biri Kenedining ijtimoiy tarmoqdagi postidan hayronmiz, u bu ishi orqali xitoyliklarning tuyg‘ularini haqoratlagan.

Futbolchimiz bu postini tezda o‘chirgan va uzr so‘ragan bo‘lsada, afsuski, ijtimoiy tarmoqlarda bu hodisa keng tarqalib ketdi. «Chelsi» bu holat uchun uzr so‘raydi. Kenedining harakati xato edi, uning harakati butun jamoa futbolchilari yoki klubning pozisiyasini bildirmaydi. Kenediga qat’iy tanbeh berildi», — deyilgan londonliklar klubi rasmiy saytidagi ingliz va xitoy tillarida keltirilgan murojaatda.

Bu holat yuzasidan Kenedining o‘zi ham uzr so‘ragan.

«Men xitoyliklardan uzr so‘ramoqchiman. Kimnidir kamsitish yoki xafa qilish niyatida bo‘lmaganman, ammo bu hazilni boshqacha tushunishdi. Aytishni istardimki, xitoyliklar va bu mamlakatni chuqur hurmat qilaman. Men shuningdek, «Chelsi»dan va jamoadoshlarimdan ularni noqulay ahvolda qoldirganim uchun uzr so‘rayman», — deb yozdi Kenedi.