Hozirgi zamonda futbolda yoshlarga e’tibor berish muhim omillardan biri sanaladi. Ya’ni bolalar va yoshlar futboliga zarur shart-sharoitlarni yaratib berish orqali milliy sportimiz kelajagini belgilash mumkin.
Jumladan, “Navbahor” futbol klubining yangi prezidenti Shavkat Abdurazzoqov dastlabki ishini yoshlarga e’tibor qaratishdan boshladi. Aynan shu maqsadda O‘zbekiston yoshlar ittifoqi Namangan shahar kengashi negizida “Navbahor” yoshlar futbol akademiyasiga asos solindi.
Yoshlar jamoasini mashg‘ulotlar o‘tkazishi uchun birinchi navbatda Namangan tuman markazi Toshbuloqdagi “Markaziy” o‘yingoh futbolchilar ixtiyoriga berildi.
30 iyul kuni tumandagi “Markaziy” o‘yingohda “Navbahor” yoshlar futbol akademiyasining taqdimot marosimi o‘tkazildi.
Tadbirda O‘zbekiston Respublikasi Oliy Majlis Senati a’zosi, Namangan viloyat hokimi, viloyat futbol federasiyasi prezidenti X.Bozorov, Namangan shahar hokimi, “Navbahor” futbol klubi prezidenti SH.Abdurazzoqov, Namangan tumani hokimi SH.Davronovlar rasmiy mehmon sifatida ishtirok etdilar.
Tadbir avvalida viloyat futbol federasiyasi prezidenti Xayrulla Bozorov so‘zga chiqdi: - “So‘nggi paytlarda yoshlarga davlat tomonidan katta e’tibor qaratilmoqda. Futbolni yoshlarsiz tasavvur qilib bo‘lmaydi. Bu kunni “Navbahor” yoshlar futbol akademiyasining tashkil etilgan sana deb tarixga muhrlab qo‘yamiz.
So‘nggi paytlarda o‘z davrida O‘zbekiston chempionligini qo‘lga kiritgan “Navbahor” jamoasining natijalari ko‘zga ko‘rinmay qoldi. Bu boradagi eng katta kamchilik yoshlarga yetarli darajada e’tibor berilmayotgani, deb o‘ylayman. Agarda oldinroq yoshlarga e’tiborni kuchaytirilganida “Navbahor” bugungi kunda zaiflashib qolmagan bo‘lardi.
Yoshlarga e’tiborni kuchaytirish orqali oldimizga qo‘yilgan vazifani uddalash mumkin. Har holda ikki milliondan ortiq Namangan aholi orasidan iqtidorlarni topish mushkul emas.
Bizdan ham o‘zbek Messisi va Ronaldusi yetishib chiqishi mumkin. Faqat iqtidorlarni murabbiylar va shu ishga ma’sul bo‘lgan mutasaddilar kashf eta olishsa bo‘lgani. Akademiyani tuzish orqali ko‘plab iqtidor egalarini tarbiyalash lozim”, - deya so‘zlarini yakunladi Xayrulla Bozorov.
Yangi tashkil etilgan yoshlar futbol akademiyasiga O‘zbekistonda ishlab chiqarilayotgan “Isuzi” rusumidagi avtobus sovg‘a qilindi.
Ma’lumot o‘rnida, “Navbahor” klubi Oliy liganing 15  turidan 19 ochko jamlagan holda 12–o‘rinni egallab turibdi.