Oliy liga 16-turidan o‘rin olgan "Obod" - "Navbahor" (0:2) uchrashuvidan so‘ng, mehmonlar ustozi Ilhom Mo‘minjonov o‘z fikrlarini bildirdi.

«Bugungi g‘alabamizni avvalambor shuncha yo‘l bosib Namangandan kelgan muxlislarimizga bag‘ishlaymiz. Bugun ishqibozlar bizga 12-o‘yinchidek muxlislik qilishdi va bu g‘alabaga o‘z ta’sirini ko‘rsatdi.

To‘g‘risi, bugungi bahsni bosim ostida o‘tkazdik. Chunki jamoa 12-o‘rinda bormoqda bu ham futbolchilarga o‘z ta’sirini ko‘rsatadi. Biz bugun natija uchun o‘ynadik, nasib qilsa keyingi bahslarda chiroyli o‘yin ko‘rsatishga harakat qilamiz. Oliy liganing 10-turidan keyin jamoamizda pasayish kuzatildi va buni tan olish kerak. Bundan keyin o‘sha xatolarni takrorlamaslikka intilamiz.

"Obod"ga qarshi ayrim futbolchilar masalan, Qilichev, Yovanovich, Mehmonov, Jabborov xuddiki raqibni mensimagandek, baribir yutamiz degan ma’noda o‘yin ko‘rsatishdi va buning uchun ayb menda. Balki ularga to‘g‘ri ko‘rsatma bera olmagan bo‘lishim mumkin. Ammo futbolda muhimi natija va g‘alabaga erishganimizdan xursandmiz» - dedi Mo‘minjonov.