Олий лига 16-туридан ўрин олган "Обод" - "Навбаҳор" (0:2) учрашувидан сўнг, меҳмонлар устози Илҳом Мўминжонов ўз фикрларини билдирди.
«Бугунги ғалабамизни авваламбор шунча йўл босиб Намангандан келган мухлисларимизга бағишлаймиз. Бугун ишқибозлар бизга 12-ўйинчидек мухлислик қилишди ва бу ғалабага ўз таъсирини кўрсатди.
Тўғриси, бугунги баҳсни босим остида ўтказдик. Чунки жамоа 12-ўринда бормоқда бу ҳам футболчиларга ўз таъсирини кўрсатади. Биз бугун натижа учун ўйнадик, насиб қилса кейинги баҳсларда чиройли ўйин кўрсатишга ҳаракат қиламиз. Олий лиганинг 10-туридан кейин жамоамизда пасайиш кузатилди ва буни тан олиш керак. Бундан кейин ўша хатоларни такрорламасликка интиламиз.
"Обод"га қарши айрим футболчилар масалан, Қиличев, Йованович, Меҳмонов, Жабборов худдики рақибни менсимагандек, барибир ютамиз деган маънода ўйин кўрсатишди ва бунинг учун айб менда. Балки уларга тўғри кўрсатма бера олмаган бўлишим мумкин. Аммо футболда муҳими натижа ва ғалабага эришганимиздан хурсандмиз» - деди Мўминжонов.
