Filippinda boks bo‘yicha o‘smirlar o‘rtasida Osiyo chempionati yakunlandi.
Musobaqada qit’amizning 18 ta mamlakatidan 138 nafar yosh bokschilar ishtirok etishdi. O‘smirlar o‘rtasidagi qit’a chempionati 13 ta vazn toifasida o‘tkazildi. E’tiborlisi, Osiyo chempionatida faqat O‘zbekiston, Qozog‘iston va Hindiston terma jamoalari to‘liq tarkib bilan ishtirok etishdi. O‘zbekiston terma jamoasi tarkibida Filippinga yo‘l olgan 13 ta bokschidan o‘ntasi yakunda sovrinli o‘rinlarga sazovor bo‘ldi.
Final janglarida ringga ko‘tarilgan olti nafar bokschimizning uchtasi raqiblarini mag‘lubiyatga uchratib oltin medallarga sazovor bo‘lishdi va Osiyo chempionligini tantana qilishdi. Hal qiluvchi bahslarda mag‘lubiyat alamini totib ko‘rgan uch nafar bokschimiz esa kumush medal bilan kifoyalandi.
Final janglari natijalari:
-52kg: Asadxo‘ja Mo‘ydinxo‘jayev - Bibars Jekshen (Qozog‘iston) - 1:4
-54kg: Rahmatullo Toshpo‘latov - Aitjan Ashirxan (Qozog‘iston) - 0:5
-57kg: Javlonbek Yuldashev - Seon Gun Gox (Janubiy Koreya) - 5:0
-63kg: Nurislom Ismoilov - Umar Kuvanchbek Uli (Qirg‘iziston) 4:1
-66kg: Asadbek Jumaniyozov - Sora Tanaka (YAponiya) 0:5
+80kg: Shohruh Almatov - Satender Singh (Hindiston) 3:2
Demak, Osiyo chempionati yakunlariga ko‘ra Javlonbek Yuldashev (-57kg.), Nurislom Ismoilov (-63kg.) va Shohruh Almatov (+80kg.) shohsupaning eng yuqori pog‘onasidan joy olgan bo‘lsalar, Asadxo‘ja Mo‘ydinxo‘jayev (-52kg.), Rahmatullo Toshpo‘latov (-54kg.) va Asadbek Jumaniyozov (-66kg.) larga kumush medallar nasib qildi.
Shuningdek, bir kun avval Muhammadmuso Abduraxmanov (-46 kg.), Ruslan Abdullayev (-48 kg.), Sherzod Qodirboyev (-60 kg.) va Kamronbek Raxmonov (-80 kg.)lar bronza medaliga loyiq ko‘rilishgandi. Ana shu tariqa O‘zbekiston terma jamoasi o‘smirlar o‘rtasidagi Osiyo chempionatida 3 ta oltin, 3 ta kumush va 4 ta bronza medallariga ega chiqdi. Ushbu natijasi evaziga O‘zbekiston terma jamoasi Osiyo chempionatini Qozog‘iston delegasiyasidan so‘ng faxrli ikkinchi o‘rinda yakunladi.
Ma’lumot uchun, bunga qadar 2017 yil hisobidan o‘tkazilgan kattalar o‘rtasidagi Osiyo chempionati (Toshkent) va yoshlar o‘rtasidagi qit’a birinchiligi (Bangkok) da O‘zbekiston terma jamoasi umumjamoa hisobida birinchi o‘rinni qo‘lga kiritgan edi.
