Toshkentda Butunjahon Teakvondo Federasiyasi Prezidenti kubogi boshlandi.

Birinchi kuni o‘smirlar o‘rtasida bellashuvlar bo‘lib o‘tdi.

Kun davomida 4 ta dayanda ja’mi 20 ta vazn toifasida medallar uchun kurash kechdi.

O‘g‘il bolalar o‘rtasidagi to‘qnashuvlarda O‘zbekiston, Tailand va Qozog‘iston taekvondochilari yuqori o‘rinlar uchun kurash olib borishdi. Yakunda hamyurtlarimiz 10 ta vazn toifasining 4 tasida oltin medalni qo‘lga kiritishdi. Termamizdan Doniyor Yo‘ldoshev, Bahodir Mirzaboyev, Ibrohim Ahmadov va Abdulaziz Mahmudov “President`s cup”da barcha raqiblarini mag‘lub etib, chempionga aylanishdi. Qozog‘iston va Tailand sportchilari esa 3 tadan vazn toifasida shohsupaning eng yuqori pog‘onasiga ko‘tarilishdi.

O‘smir qizlar o‘rtasidagi bahslarda ham medallar uchun kurash yuqorida nomi kelgan mamlakatlar taekvondochilari o‘rtasida kechdi. Yakunda O‘zbekiston vakillari 10 ta vazn toifasining 6 tasida birinchi bo‘lishdi. Jumladan, Madinabonu Mannopova, Zarnigor Abdullayeva, Milana Golubeva, Feruza Sodiqova, Zahro Rustamova hamda Muhayyo Sirojiddinova o‘z vazn toifalarida raqiblariga hech qanday imkon qoldirmay terma jamaomiz hisobiga oltin medal qo‘shib qo‘yishdi.

Butunjahon Teakvondo Federasiyasi Prezident kubogi musobaqasi birinchi kunida O‘zbekistonlik sportchilar jami 10 ta oltin, 10 ta kumush va 22 ta bronza medalini qo‘lga kiritishdi. Eslatib o‘tamiz, musobaqa 13 avgustgacha davom etadi. Oldinda muxlislarni kattalar o‘rtasidagi bahslar kutmoqda.