Тошкентда Бутунжаҳон Теаквондо Федерацияси Президенти кубоги бошланди.
Биринчи куни ўсмирлар ўртасида беллашувлар бўлиб ўтди.
Кун давомида 4 та даянда жаъми 20 та вазн тоифасида медаллар учун кураш кечди.
Ўғил болалар ўртасидаги тўқнашувларда Ўзбекистон, Таиланд ва Қозоғистон таэквондочилари юқори ўринлар учун кураш олиб боришди. Якунда ҳамюртларимиз 10 та вазн тоифасининг 4 тасида олтин медални қўлга киритишди. Термамиздан Дониёр Йўлдошев, Баҳодир Мирзабоев, Иброҳим Аҳмадов ва Абдулазиз Маҳмудов “President`s cup”да барча рақибларини мағлуб этиб, чемпионга айланишди. Қозоғистон ва Таиланд спортчилари эса 3 тадан вазн тоифасида шоҳсупанинг энг юқори поғонасига кўтарилишди.
Ўсмир қизлар ўртасидаги баҳсларда ҳам медаллар учун кураш юқорида номи келган мамлакатлар таэквондочилари ўртасида кечди. Якунда Ўзбекистон вакиллари 10 та вазн тоифасининг 6 тасида биринчи бўлишди. Жумладан, Мадинабону Маннопова, Зарнигор Абдуллаева, Милана Голубева, Феруза Содиқова, Заҳро Рустамова ҳамда Муҳайё Сирожиддинова ўз вазн тоифаларида рақибларига ҳеч қандай имкон қолдирмай терма жамаомиз ҳисобига олтин медал қўшиб қўйишди.
Бутунжаҳон Теаквондо Федерацияси Президент кубоги мусобақаси биринчи кунида Ўзбекистонлик спортчилар жами 10 та олтин, 10 та кумуш ва 22 та бронза медалини қўлга киритишди. Эслатиб ўтамиз, мусобақа 13 августгача давом этади. Олдинда мухлисларни катталар ўртасидаги баҳслар кутмоқда.
