Ispaniya qirolligi futbol federasiyasi (RFEF) «Real»ning Ronaldu diskvalifikasiyasi bo‘yicha bergan apellyasiyasini ko‘rib chiqdi.

Shikoyatni o‘rganib chiqqan komissiya "Real" klubining da’vosini o‘rinsiz deb topdi va futbolchining diskvalifikasiyasini o‘z kuchida qoldirdi.

Eslatib o‘tamiz, Ronaldu «Barselona»ga (3:1) qarshi Superkubok bahsining 82-daqiqasida bosh hakam Rikardo Bengoechea tomonidan maydondan chetlatilgach, uni qo‘li bilan turtib yuborgan edi.

RFEF Ronalduning bu harakatlarini tajovuzkorona deb baholab, uni qizil karta uchun 1 o‘yinga, hakamni turtgani uchun 4 o‘yinga diskvalifikasiya qildi.

Endi Ronaldu «Barselona»ga qarshi Superkubok javob o‘yinini, shuningdek Ispaniya chempionatidan o‘rin olgan «Deportivo», «Valensiya», «Levante» va «Real Sosyedad»ga qarshi o‘yinlarni o‘tkazib yuboradi.