"Bavariya" himoyachisi Mats Hummels "MYU" yarimhimoyachisi Xuan Mata tashabbusini qo‘llab quvvatladi.
Avvalroq, Mata maoshining 1 foizini xayriyaga sarflab, butun dunyoda futbolni rivojlantirish bilan shug‘ullanuvchi Common Goal tashkilotiga berishini, shuningdek u o‘zi kabi, maoshining 1 foizini xayriyaga sarflaydigan 11 nafar futbolchidan jamoa tuzmoqchi ekanini e’lon qilgandi.
Mats Hummels Mataning tashabbusiga qo‘shilish istagini bildirgan ilk futbolchi bo‘ldi.
«Bu haqda eshitishim bilanoq, uni qo‘llab-quvvatlashga qaror qildim. Bu dunyoni futbol orqali oz bo‘lsa-da yaxshilash uchun tashlangan qadamdir», – dedi Hummels.
O‘z navbatida Mata nemis futbolchisining bu qarorini olqishlab, uni "ajoyib jamoadosh" deb atadi.
