"Бавария" ҳимоячиси Матс Ҳуммелс "МЮ" яримҳимоячиси Хуан Мата ташаббусини қўллаб қувватлади.
Аввалроқ, Мата маошининг 1 фоизини хайрияга сарфлаб, бутун дунёда футболни ривожлантириш билан шуғулланувчи Common Goal ташкилотига беришини, шунингдек у ўзи каби, маошининг 1 фоизини хайрияга сарфлайдиган 11 нафар футболчидан жамоа тузмоқчи эканини эълон қилганди.
Матс Ҳуммелс Матанинг ташаббусига қўшилиш истагини билдирган илк футболчи бўлди.
«Бу ҳақда эшитишим биланоқ, уни қўллаб-қувватлашга қарор қилдим. Бу дунёни футбол орқали оз бўлса-да яхшилаш учун ташланган қадамдир», – деди Ҳуммелс.
Ўз навбатида Мата немис футболчисининг бу қарорини олқишлаб, уни "ажойиб жамоадош" деб атади.
