Oliy liga 18- tur bellashuvlari doirasida “Navbahor” Farg‘onaning “Neftchi” jamoasi mehmoni bo‘ldi.
“Vodiy derbisi” maqomidagi mazkur uchrashuvda g‘olib aniqlanmadi.
Birinchi bo‘lim teng kurashlar ostida o‘tdi. Har ikki jamoa darvozalar oldida bir qator xavfli vujudlarni vujudga keltirishdi. Taym o‘rtalarigacha “Navbahor”dan Ro‘zim Ahmedov, “Neftchi”dan Mo‘ydin Mamazulumov qulay imkoniyatlardan foydalana olishmadi.
Ammo bu ikki o‘yinchi baribir o‘z maqsadiga yetdi. 29-daqiqada o‘ng qanotdan oshirilgan to‘pni Mamazulumov boshi bilan darvozaga joylab, hisobni ochdi. Bu gol mehmonlarni oldinga o‘tishga majbur qildi. Ketma-ket tashkil etilgan hujumlar 41- daqiqada golga olib keldi. Raqib darvozabonidan qaytgan to‘pni Ro‘zim Ahmedov osonlik bilan darvozaga joylashga muvaffaq bo‘ldi, 1:1.
Bahsning ikkinchi yarmida garchi jamoalar ko‘plab xavfli vaziyatlarni sodir etgan bo‘lishsa-da, hisobni o‘zgartirish nasib etmadi. Shu tariqa “Vodiy derbisi”da murosasiz durang qayd etildi. E’tiborlisi, jamoalarning birinchi davrada Namanganda bo‘lib o‘tgan o‘zaro qarama-qarshiligi ham 1:1 hisobida yakunlangan edi.
Oliy liga, 18-tur
19 avgust. Farg‘ona. “Istiqlol” o‘yingohi.
“Neftchi” – “Navbahor” – 1:1 (1:1)
Gollar: M. Mamazulumov (29) – R. Ahmedov (41).
Hakamlar: V. Seytlin, A. Sapenko, A. Burov, J. Muxtorov.
Nazoratchi – A. Popov.
“Neftchi”: 1. O‘tkir Yusupov, 3. Doston Tursunov, 4. Kamronbey Kapadze, 10. Mo‘ydin Mamazulumov (99. Otabek Haydarov, 76), 17. Muzaffar Muzaffarov, 19. Jasur Hasanov, 23. Abdurahmon Abdulxaqov (70. Mansur Saidov, 62), 24. Abdujamol Isroilov, 32. Murodjon To‘ychiboyev, 34. Ibrohim Rahimov, 71. Alisher Shog‘ulomov (20. Dilyor Irmatov, 64).
“Navbahor”: 30. Asilbek Amanov, 5. G‘iyosjon Komilov, 7. Oybek Qilichev, 9. Dilshod Jabborov, 19. Mirzohid G‘ofurov, 21. A’zam Aliyev, 22. Ro‘zimboy Ahmedov (18. Doniyor Usmonov, 75), 24. Sardor Azimov (17. Ilhom Boydedayev, 66), 32. Jahongir Mehmonov, 44. Darko Stanoyevich, 70. Abbos Maxstaliyev (84. Nemanya Yovanovich, 63).
Ogohlantirishlar: A. Abdulhaqov (25) - A. Maxstaliyev (17).
