Poytaxtimizda 21-22 avgust kunlari para-atletika bo‘yicha Respublika chempionati bo‘lib o‘tdi.

Musobaqada yurtimizning barcha hududlardan 150 dan ortiq sportchi g‘oliblik uchun bahslashdi. Mazkur chempionatni o‘tkazishdan ko‘zlangan asosiy maqsad iste’dodli yosh sportchilarni saralab olib, kelasi yili Indoneziya poytaxti Jakarta shahrida bo‘lib o‘tadigan Para Osiѐ o‘yinlarida ishtirok etadigan terma jamoamiz tarkibini shakllantirishdan iborat edi.

Shiddatli bahslarga boy o‘tgan musobaqalarda para-atletikaning nayza, disk, yadro uloqtirish, uzunlikka sakrash, shuningdek, 100, 200, 400 va 800 metr masofalarga yugurish bo‘yicha bellashuvlar tashkil etildi. Ikki kun davom etgan bahslar yakuniga ko‘ra umumjamoa hisobida 1- o‘rinni Toshkent shahri (12ta oltin, 6ta kumush, 5ta bronza), 2 -o‘rinni Toshkent viloyati (10ta oltin, 7ta kumush, 1ta bronza) hamda 3-o‘rinni Farg‘ona viloyati (8ta oltin, 4ta kumush, 11ta bronza) sportchilari egallab, sovrinli o‘rinlarni qo‘lga kiritishdi.

Musobaqa yakunida chempionat g‘oliblari tashkilotchilar tomonidan munosib rag‘batlantirildi. Sovrinli o‘rinlarni egallagan sportchilarga O‘zbekiston Milliy Paralimpiya Assosiasiyasi ta’sis etgan esdalik sovg‘alari topshirildi.