Janubiy Koreya futbol assosiasiyasi oktyabr oyida 2ta o‘rtoqlik o‘yini tashkil etish uchun raqiblar qidirmoqda.

"Oktyabr oyidagi FIFA kunlarida UYEFA terma jamoalari JCH-2018 saralash o‘yinlarini o‘tkazadi. Shu bois, Yevropa jamoalari bilan o‘rtoqlik o‘yini tashkil qilish qiyin bo‘ladi. Shu bois, bu vaqtda Janubiy Koreya terma jamoasi Afrika jamoalari bilan to‘qnash kelsa kerak", - dedi KFA vakili.

Koreyaliklar to‘g‘ridan-to‘g‘ri JCH-2018 yo‘llanmasini qo‘lga kiritishsa, oktyabr oyida o‘rtoqlik o‘yinlarida ishtirok etishlari mumkin. Aks holda, ularda bunday imkoniyat bo‘lmaydi. Boisi, J.Koreya saralash bosqichida 3-o‘rinni egallasa, oktyabr oyida JCH-2018 yo‘llanmasi uchun pley-off bosqichida ishtirok etishga majbur bo‘ladi.

Koreya terma jamoasi hozirda guruhda 13 ochko bilan 2-o‘rinni egallab turibdi. O‘zbekiston esa ulardan 1 ochko kam jamg‘argan holda, 3-o‘rinni band etib turibdi. J.Koreya 31 avgust kuni o‘z uyida Eronni qabul qilsa, oradan 5 kun o‘tib Toshkentda O‘zbekiston mehmoni bo‘ladi.

Osiyodagi saralash bosqichida guruhlarda 3-o‘rinni egallagan jamoalar oktyabr oyida o‘zaro pley-off bosqichida ishtirok etishadi. G‘olib chiqqan jamoa noyabr oyida KONKAKAF mintaqasi vakili bilan JCH yo‘llanmasi uchun pley-off shaklida to‘qnash keladi.