Joriy yilning 9 sentyabr kuni poytaxtimizdagi “Bunyodkor” stadionida jangovar yakkakurashlar bo‘yicha “Asian fight – 2017” xalqaro turniri bo‘lib o‘tadi.

O‘zbekiston Respublikasi Jismoniy tarbiya va sport davlat qo‘mitasi, Sharq yakkakurashlari va jang san’atlarini rivojlantirish markazi, mamlakatimiz penchak silat federasiyasi, Uzmobile kompaniyasi tomonidan qator davlat va jamoat tashkilotlari bilan hamkorlikda tashkil etilayotgan turnirda yurtimiz yakkakurash ustalari bilan birga o‘nga yaqin davlatdan kelgan sportchilar o‘zaro kuch sinashadi.

Alisher Navoiy nomidagi O‘zbekiston Milliy kutubxonasida mazkur xalqaro turnir oldidan tashkilotchilar, sportchilar va ommaviy axborot vositalari xodimlari ishtirokida matbuot anjumani tashkil etildi.

Anjumanda mamlakatimizda sportni rivojlantirish, o‘sib kelayotgan yosh avlodni har tomonlama barkamol insonlar qilib voyaga yetkazish, ularning jismoniy tarbiya va sport bilan muntazam shug‘ullanishi, o‘z iqtidor va salohiyatini namoyon etishi uchun zarur sharoitlarni yaratishga qaratilayotgan doimiy e’tibor samarasida sportning yakkakurash turlari ham yoshlarimiz orasida jadal ommalashayotgani ta’kidlandi.

O‘zbekiston penchak silat federasiyasi tomonidan “Asian fight –2017” xalqaro turnirining tashkil etilishidan ko‘zlangan maqsad yoshlar o‘rtasida sog‘lom turmush tarzini keng targ‘ib qilish, ularni sportning yakkakurash turlariga keng jalb etishdan iboratdir.

Mamlakatimizda ilk bor o‘tkaziladigan ushbu turnirda sportning yakkakurash turlari bo‘yicha Osiyo va jahon chempionatlarida sovrinli o‘rinlarni egallagan sportchilarimiz Mahmud Murodov, Anvar Boynazarov, Jasur Mirzamuhammedov, Ulug‘bek Umarov, Hasanxon Baratov, Muhammadali Toshturg‘unov, Isroil Rasulov, Ayubxon Kamolov va Ahliddin Mirzadavlatov Vatanimiz sharafini himoya qiladi.