Жорий йилнинг 9 сентябрь куни пойтахтимиздаги “Бунёдкор” стадионида жанговар яккакурашлар бўйича “Asian fight – 2017” халқаро турнири бўлиб ўтади.
Ўзбекистон Республикаси Жисмоний тарбия ва спорт давлат қўмитаси, Шарқ яккакурашлари ва жанг санъатларини ривожлантириш маркази, мамлакатимиз пенчак силат федерацияси, Uzmobile компанияси томонидан қатор давлат ва жамоат ташкилотлари билан ҳамкорликда ташкил этилаётган турнирда юртимиз яккакураш усталари билан бирга ўнга яқин давлатдан келган спортчилар ўзаро куч синашади.
Алишер Навоий номидаги Ўзбекистон Миллий кутубхонасида мазкур халқаро турнир олдидан ташкилотчилар, спортчилар ва оммавий ахборот воситалари ходимлари иштирокида матбуот анжумани ташкил этилди.
Анжуманда мамлакатимизда спортни ривожлантириш, ўсиб келаётган ёш авлодни ҳар томонлама баркамол инсонлар қилиб вояга етказиш, уларнинг жисмоний тарбия ва спорт билан мунтазам шуғулланиши, ўз иқтидор ва салоҳиятини намоён этиши учун зарур шароитларни яратишга қаратилаётган доимий эътибор самарасида спортнинг яккакураш турлари ҳам ёшларимиз орасида жадал оммалашаётгани таъкидланди.
Ўзбекистон пенчак силат федерацияси томонидан “Asian fight –2017” халқаро турнирининг ташкил этилишидан кўзланган мақсад ёшлар ўртасида соғлом турмуш тарзини кенг тарғиб қилиш, уларни спортнинг яккакураш турларига кенг жалб этишдан иборатдир.
Мамлакатимизда илк бор ўтказиладиган ушбу турнирда спортнинг яккакураш турлари бўйича Осиё ва жаҳон чемпионатларида совринли ўринларни эгаллаган спортчиларимиз Маҳмуд Муродов, Анвар Бойназаров, Жасур Мирзамуҳаммедов, Улуғбек Умаров, Ҳасанхон Баратов, Муҳаммадали Тоштурғунов, Исроил Расулов, Аюбхон Камолов ва Аҳлиддин Мирзадавлатов Ватанимиз шарафини ҳимоя қилади.
