Xabaringiz bor, ertaga, 12 sentyabrda O‘zbekiston futbol federasiyasining hisobot yig‘ilishi bo‘lib o‘tadi.
Ushbu yig‘ilish davomida federasiyaga yangi rahbariyat saylanishi rejalashtirilgan.
Ma’lum bo‘lishicha, O‘FF rahbariyati to‘lig‘icha iste’foga chiqmaydi. Uzoq yillar davomida Terma jamoalar markazi direktori lavozimida ishlab kelgan va ayni vaqtda O‘FF vise-prezidenti bo‘lib turgan Asqar Tolibjonov federasiyadagi faoliyatini davom ettirishi kutilmoqda. Tolibjonov yangi rahbariyat davrida ham ishini davom ettirishi mumkin.
Eslatib o‘tamiz, Asqar Tolibjonov Terma jamoalar markazini boshqarish davomida ko‘p bora tanqid ostiga olingan.
U bekor qilingan o‘rtoqlik o‘yinlari va O‘zbekiston milliy terma jamoasi ishtirokidagi rasmiy bahslar uchun chiqarilgan chiptalar olib-sotarlar qo‘liga o‘tib ketishi bilan bog‘liq vaziyatlarda muxlislar noroziligiga sababchi bo‘lgan edi.
