UYEFA terma jamoalar o‘rtasidagi butunlay boshqacha – liga formatidagi musobaqa – Millatlar ligasini taqdim qildi.

Musobaqa formati aksariyat milliy chempionatlarni eslatib yuboradi: UYEFAga a’zo 55 mamlakat terma jamoasi 2018 yilgi Jahon chempionati saralash bosqichidagi ishtiroki yakunlari bo‘yicha beriladigan koeffisiyentlar reytingiga qarab 4 ta, A-B-C-D divizionlariga bo‘linadi. Bu reyting 2017 yil 15 noyabrda e’lon qilinadi.

A divizionida reytingdagi dastlabki 12 o‘rinni egallagan terma jamoa qatnashsa, keyingi 12 terma jamoa B guruhidan o‘rin oladi. Keyingi o‘rinlardagi 15 terma jamoa C guruhida, qolgan 16 terma jamoa esa D guruhida ishtirok etadi. A va B divizionlarning har birida 3 tadan jamoa bo‘lgan 4 ta guruhga bo‘linadi. C divizonida bitta 3 jamoali va 3 ta 4 jamoali guruh bo‘ladi, D divizionidagi 4 ta guruhda esa 4 tadan jamoa qatnashadi.

Divizionlarning yakuniy ko‘rinishi 2018 yilgi Jahon chempionatiga saralash bosqichi o‘yinlari yakunlangach, 2017 yil noyabr oyida e’lon qilinadigan reytingga asoslanadi.

2020 yil mart oyida o‘tkaziladigan pley-off o‘yinlari orqali to‘rttala diviziondan bittadan jamoaga Yevro-2020da ishtirok etish imkoniyati kafolatlanadi.