УЕФА терма жамоалар ўртасидаги бутунлай бошқача – лига форматидаги мусобақа – Миллатлар лигасини тақдим қилди.

Мусобақа формати аксарият миллий чемпионатларни эслатиб юборади: УЕФАга аъзо 55 мамлакат терма жамоаси 2018 йилги Жаҳон чемпионати саралаш босқичидаги иштироки якунлари бўйича бериладиган коэффициентлар рейтингига қараб 4 та, A-B-C-D дивизионларига бўлинади. Бу рейтинг 2017 йил 15 ноябрда эълон қилинади.

A дивизионида рейтингдаги дастлабки 12 ўринни эгаллаган терма жамоа қатнашса, кейинги 12 терма жамоа B гуруҳидан ўрин олади. Кейинги ўринлардаги 15 терма жамоа C гуруҳида, қолган 16 терма жамоа эса D гуруҳида иштирок этади. A ва B дивизионларнинг ҳар бирида 3 тадан жамоа бўлган 4 та гуруҳга бўлинади. C дивизонида битта 3 жамоали ва 3 та 4 жамоали гуруҳ бўлади, D дивизионидаги 4 та гуруҳда эса 4 тадан жамоа қатнашади.

Дивизионларнинг якуний кўриниши 2018 йилги Жаҳон чемпионатига саралаш босқичи ўйинлари якунлангач, 2017 йил ноябр ойида эълон қилинадиган рейтингга асосланади.

2020 йил март ойида ўтказиладиган плей-офф ўйинлари орқали тўрттала дивизиондан биттадан жамоага Евро-2020да иштирок этиш имконияти кафолатланади.