Oliy Liganing 22-tur uchrashuvlari doirasidagi markaziy o‘yin poytaxtimizdagi “Lokomotiv” stadionida o‘tadi.
Unda O‘zbekistonning amaldagi chempioni hamda mamlakat kubogi sohibi, qolaversa, ayni damda milliy chempionatimiz musobaqa jadvalida yakka peshqadam bo‘lib turgan – “Lokomotiv” Toshkentning yana bir jamoasi – “Paxtakor”ni sinovdan o‘tkazadi.
O‘zbek futboli jamoatchiligi diqqat markazida bo‘lib turgan ushbu qarama-qarshilikni tajribali FIFA referisi – Vladislav Seytlin boshqarib boradi.
Oliy Liga, 22-tur. 21 sentyabr (payshanba)
«LOKOMOTIV» (TOSHKENT) – «PAXTAKOR» (TOSHKENT)
Hakamlar: V. Seytlin (Toshkent), M. Saidqosimov (Toshkent), R. Shoyahmetov (Toshkent), J. Muxtorov (Toshkent)
Nazoratchi: A. Xotamov (Toshkent).
PFL vakili: N. Lutfulin.
“Lokomotiv” bu safar ham “Paxtakor”ni mag‘lub etishga urinadi
Joriy yilgi mavsumni anchagina ko‘tarinki ruhda o‘tkazayotgan “temiryo‘lchilar” jamoasi birinchi davrada “Paxtakor”ni safarda mag‘lub etishni uddalagan edi. Yodingizda bo‘lsa, jamoamiz 7-tur o‘yinlari doirasida “Paxtakor” mehmoni bo‘lib, 2:1 hisobida zafar quchgandi. O‘sha uchrashuvda “Loko”ning har ikkala goliga milliy chempionatimiz to‘purari Marat Bikmayev mualliflik qilgandi.
O‘zaro o‘yinlar tarixi haqida
Qayd etish joizki, “Lokomotiv” hamda “Paxtakor” jamoalari o‘rtasidagi o‘zaro uchrashuvlar soni 25tani tashkil etadi. Oliy Liga doirasida o‘tkazilgan ushbu o‘yinlarning 16tasida “sherlar” jamoasi, 4tasida “Loko” futbolchilari g‘alaba qozonishgan. Yana 5ta bellashuv esa durang bilan yakunlangan.
Ta’kidlash joizki, “Lokomotiv” “Paxtakor”ga mag‘lub bo‘lgan o‘yinlarning aksariyatida “temiryo‘lchilar” hali chempionatimizning o‘rtamiyona jamoalari qatorida e’tirof etilar edi. Ammo so‘nggi yillarga kelib “Lokomotiv” o‘rtamiyona jamoalar qatoridan mamlakatimiz futbolining grandi darajasiga ko‘tarila oldi hamda hozirda ham chempionat jadvalini boshqarib bormoqda.
Jamoalarning so‘nggi 5 uchrashuvi:
“Paxtakor” – “Lokomotiv” 1:2 (Oliy Liga-2017. 1-davra)
“Paxtakor” – “Lokomotiv” 2:1 (Oliy Liga-2016. 2-davra)
“Lokomotiv” – “Paxtakor” 1:0 (Oliy Liga-2016. 1-davra)
“Paxtakor” – “Lokomotiv” 2:1 (Oliy Liga-2015. 2-davra)
“Lokomotiv” – “Paxtakor” 2:1 (Oliy Liga-2015. 1-davra)
