Bugun professional bokschimiz, Rio Olimpiadasi chempioni Fazliddin G‘oibnazarov o‘zining uchinchi g‘alabasiga erishdi.
Mashhur promouter Bob Arumga tegishli Top Rank promouterlik kompaniyasi mijozi bo‘lgan hamyurtimiz AQSHning Arizona shtati Tuson shahrida meksikalik Viktor Rosasni 80:72, 80:72, 80:72 hisobida mag‘lub etdi.
E’tiborlisi, G‘oibnazarovning navbatdagi jangi qachon, qayerda va xatto kimga qarshi o‘tkazilishi ham ma’lum bo‘ldi. Unga ko‘ra, bokschimiz 9 dekabr kuni AQSHning Nyu-York shahridagi o‘z bag‘riga 5 500 tomoshabinni sig‘dira oluvchi muhtasham Madison Square Garden arenasida ringga ko‘tariladi.
Fazliddinning professional ringdagi to‘rtinchi raqibi meksikalik Aleksis Del Boske bo‘ladi. 22 yoshli Boske faoliyati davomida 17 ta jang o‘tkazib, shularning 13 tasida g‘alabaga erishgan. To‘qqizta jangda raqiblarini nokautga uchratgan. To‘rt bor mag‘lub bo‘lgan. Bitta jangda nokautga uchragan.
Ko‘rinib turibdiki, G‘oibnazarovning raqibi ancha jiddiy bokschi. U so‘nggi bor shu yilning 30 iyun kuni jang o‘tkazgan va amerikalik Ramo Assensioni nokautga uchratgan edi.
Ma’lumot uchun, 9 dekabr kungi boks oqshomining markaziy jangi Vasiliy Lomachenko ishtirokida o‘tkaziladi. Ukrainalik 29 yoshli bokschi kubalik 36 yoshli Gilyermo Rigondoga qarshi ringga ko‘tariladi. Jang birinchi yengil vazn (59 kg) toifasida o‘tkazilib, o‘rtaga Lomachenkoga tegishli WBO chempionlik kamari qo‘yiladi.
