«Barselona» yarimhimoyachisi Ivan Rakitich 17 avgust kuni terakt qurboni bo‘lishi mumkin edi.
Futbolchi o‘sha kuni mudhish voqea sodir bo‘lgan ko‘chaga bormoqchi bo‘lgan. Biroq, so‘nggi pallada xotini uning fikridan qaytargan.
«Oilam bilan Barselona markazida edik va aynan terakt sodir bo‘lgan ko‘chaga bormoqchi bo‘ldik. Ammo xotinim bolalar uy oldidagi xiyobonda o‘ynab yursa yaxshi bo‘lardi dedi. Uning gapiga ko‘nganim uchun Xudoga shukrona aytaman. Biz terakt sodir bo‘lgan joydan 3-4 daqiqalik yo‘lda edik" - dedi Rakitich AS xabarida.
Eslatib o‘tamiz, 17 avgust kuni Barselona markazida, yuk avtomobili vositasida amalga oshirilgan teraktda o‘nlab insonlar hayotdan ko‘z yumgandi.
