Kecha, 1 oktyabr kuni Gruziyaning “Zugdidi” jamoasi darvozaboni, 31 yoshli Shota Maminashvili o‘yindan oldin o‘tkaziladigan mashg‘ulotlarda hushini yo‘qotib maydonga yiqildi.
Ma’lum bo‘lishicha, darvozabonni zudlik bilan shifoxonaga yetkazishgan, ammo Maminashvili noma’lum sabablarga ko‘ra shifoxonaning o‘zida hayot bilan vidolashgan. Bu haqda mahalliy manbalarga tayanib “Chempionat” nashri xabar bermoqda.
Ushbu tragedik voqea sabab “Zugdidi” hamda “Vit Jorjiya” jamoalari o‘rtasida belgilangan uchrashuv qoldirildi.
Ma’lumot uchun, Maminashvili faoliyatining katta qismini Batumning “Dinamo” jamoasida o‘tkazgan bo‘lib, joriy mavsum boshida “Zugdidi” jamoasi futbolchisiga aylangandi.
Shota Maminashvilining vafot etish sabablari haqida hozircha biror bir rasmiy ma’lumot keltirib o‘tilmadi.