Angliya premyer-ligisi klublari chempionatning xorijdagi translyasiyasi huquqini sotishdan tushadigan daromadni taqsimlash borasida hozircha kelishuvga erisha olishmadi.
"Chelsi", "Arsenal", "Manchester Yunayted", "Manchester Siti", "Tottenxem" va "Liverpul" jamoalari mazkur daromadning taqsimlanish tizimini o‘zgartirishni istashmoqda. Ushbu klublar daromadning 35 foizi ushbu jamoalar o‘rtasida mavsumda egallagan o‘rinlaridan kelib chiqib taqsimlanishini istashmoqda.
APL 2019-2022 yillar oralig‘ida AQSH va Xitoy telekompaniyalari bilan yangi shartnomalar imzolagan. Shu bois, jamoalar translyasiyalar huquqidan tushadigan daromadni qaytadan taqsimlanishini istashmoqda. Jamoalar noyabr oyida yana yig‘ilish tashkil qilib, ushbu masalada bir to‘xtamga kelishga harakat qilishadi.
Eslatib o‘tamiz, 2018/19 mavsum oxiriga qadar tuzilgan shartnomaga ko‘ra, teletranslyasiyalar huquqining xorij mamlakatlariga sotilishdan tushgan daromad hozir APL jamoalari o‘rtasida teng taqsimlanadi. Har yili bitta jamoa 39 million funt oladi.













