Англия премьер-лигиси клублари чемпионатнинг хориждаги трансляцияси ҳуқуқини сотишдан тушадиган даромадни тақсимлаш борасида ҳозирча келишувга эриша олишмади.
"Челси", "Арсенал", "Манчестер Юнайтед", "Манчестер Сити", "Тоттенхэм" ва "Ливерпуль" жамоалари мазкур даромаднинг тақсимланиш тизимини ўзгартиришни исташмоқда. Ушбу клублар даромаднинг 35 фоизи ушбу жамоалар ўртасида мавсумда эгаллаган ўринларидан келиб чиқиб тақсимланишини исташмоқда.
АПЛ 2019-2022 йиллар оралиғида АҚШ ва Хитой телекомпаниялари билан янги шартномалар имзолаган. Шу боис, жамоалар трансляциялар ҳуқуқидан тушадиган даромадни қайтадан тақсимланишини исташмоқда. Жамоалар ноябрь ойида яна йиғилиш ташкил қилиб, ушбу масалада бир тўхтамга келишга ҳаракат қилишади.
Эслатиб ўтамиз, 2018/19 мавсум охирига қадар тузилган шартномага кўра, телетрансляциялар ҳуқуқининг хориж мамлакатларига сотилишдан тушган даромад ҳозир АПЛ жамоалари ўртасида тенг тақсимланади. Ҳар йили битта жамоа 39 миллион фунт олади.