La liganing 8-turiga kelib "Barselona" ushbu mavsumda ilk marta ochko yo‘qotdi. FIFA kunlaridan keyin qayta yig‘ilgan "Barselona" Madridda "Atletiko"ga qarshi o‘yinda oson bo‘lmagan uchrashuvni o‘tkazdi.

O‘yinning 30-soniyasidayoq Messi hisobni ochishi mumkin edi, ammo himoyachi so‘nggi pallada unga xalal berib qoldi. Antuan Grizmann esa "ko‘k-anorranglilar" darvozasiga tomon 2ta xavfli zarba yo‘lladi. Ter Shtegen ajoyib seyvlar orqali o‘z darvozasi daxlsizligini saqlab qoldi. Bahsning 21-daqiqasida Saul jarima maydonchasi tashqarisidan qaytarib bo‘lmas zarba bilan hisobni ochishga muvaffaq bo‘ldi.

Bugungi o‘yinda Messining ko‘p zarblari himoyachilardan o‘tmagan bo‘lsa, ikkinchi bo‘limda argentinalik futbolchi yo‘llagan 2ta zarbaga ozgina aniqlik yetishmadi. Asta-sekin o‘z formasini tiklab borayotgan Luis Suares o‘yin tugashiga 5 daqiqa qolganida "Barsa"ni mag‘lubiyatdan qutqarib qoldi. Serji Roberto yetkazib bergan uzatmani urugvaylik futbolchi bosh bilan darvozaga joylab qo‘ydi.

Uchrashuvga qo‘shib berilgan daqiqalarning eng so‘nggisi o‘tib borayotgan paytda "Barselona" raqib jarima maydonchasi yarim aylanasi ichida jarima zarbasini tepish huquqiga ega bo‘ldi. Lionel Messi tomonidan yo‘llangan zarbani Yan Oblak egallab olishga muvaffaq bo‘ldi.

Shu tariqa, o‘yin durang bilan yakunlandi. Mazkur 1 ochko tufayli "Barsa" o‘z ochkolarini 22taga yetkazdi va endi Valverde shogirdlari 2-o‘ringa chiqib olgan "Real"da 5 ochko oldinda borishmoqda.

Ispaniya La ligasi, 8-tur
Atletiko – Barselona 1:1 (1:0, 0:1)
Gollar: 1:0 – 21 Saul, 1:1 – 82 Suares.
Atletiko – Oblak, Savich, Filipe Luis, Xuanfran, Godin, Saul, Gabi (Torres, 83), Ferreyra Karrasko (Parti, 73), Koke, Korrea (Gaytan, 59), Grizmann.
Barselona – ter Stegen, Umtiti, Alba, Nelson Semedu (Serdji Roberto, 61), Pike, Rakitich (Paulinyo, 79), Buskets, Inyesta (Deulofeu, 61), Andre Gomesh, Messi, Suares.
Ogohlantirishlar: Gabi (14), Umtiti (33), Rakitich (45), Grizmann (90), Saul (90).