Ла лиганинг 8-турига келиб "Барселона" ушбу мавсумда илк марта очко йўқотди. ФИФА кунларидан кейин қайта йиғилган "Барселона" Мадридда "Атлетико"га қарши ўйинда осон бўлмаган учрашувни ўтказди.

Ўйиннинг 30-сониясидаёқ Месси ҳисобни очиши мумкин эди, аммо ҳимоячи сўнгги паллада унга халал бериб қолди. Антуан Гризманн эса "кўк-анорранглилар" дарвозасига томон 2та хавфли зарба йўллади. Тер Штеген ажойиб сэйвлар орқали ўз дарвозаси дахлсизлигини сақлаб қолди. Баҳснинг 21-дақиқасида Сауль жарима майдончаси ташқарисидан қайтариб бўлмас зарба билан ҳисобни очишга муваффақ бўлди.

Бугунги ўйинда Мессининг кўп зарблари ҳимоячилардан ўтмаган бўлса, иккинчи бўлимда аргентиналик футболчи йўллаган 2та зарбага озгина аниқлик етишмади. Аста-секин ўз формасини тиклаб бораётган Луис Суарес ўйин тугашига 5 дақиқа қолганида "Барса"ни мағлубиятдан қутқариб қолди. Сержи Роберто етказиб берган узатмани уругвайлик футболчи бош билан дарвозага жойлаб қўйди.

Учрашувга қўшиб берилган дақиқаларнинг энг сўнггиси ўтиб бораётган пайтда "Барселона" рақиб жарима майдончаси ярим айланаси ичида жарима зарбасини тепиш ҳуқуқига эга бўлди. Лионель Месси томонидан йўлланган зарбани Ян Облак эгаллаб олишга муваффақ бўлди.

Шу тариқа, ўйин дуранг билан якунланди. Мазкур 1 очко туфайли "Барса" ўз очколарини 22тага етказди ва энди Вальверде шогирдлари 2-ўринга чиқиб олган "Реал"да 5 очко олдинда боришмоқда.

Испания Ла лигаси, 8-тур
Атлетико – Барселона 1:1 (1:0, 0:1)
Голлар: 1:0 – 21 Сауль, 1:1 – 82 Суарес.
Атлетико – Облак, Савич, Филипе Луис, Хуанфран, Годин, Сауль, Габи (Торрес, 83), Феррейра Карраско (Парти, 73), Коке, Корреа (Гайтан, 59), Гризманн.
Барселона – тер Стеген, Умтити, Альба, Нелсон Семеду (Серджи Роберто, 61), Пике, Ракитич (Паулиньо, 79), Бускетс, Иньеста (Деулофеу, 61), Андре Гомеш, Месси, Суарес.
Огоҳлантиришлар: Габи (14), Умтити (33), Ракитич (45), Гризманн (90), Сауль (90).