Ozarbayjon futbol federasiyasi milliy terma jamoa bosh murabbiyi Robert Prosinechkini JCH–2018 final bosqichiga chiqish vazifasi bajarilmaganidan so‘ng o‘z lavozimidan bo‘shatishga qaror qildi.
Ma’lum bo‘lishicha, OFF prezidenti Ravnaq Abdullayev va 48 yoshli xorvatiyalik mutaxassis o‘rtasidagi suhbatdan keyin ikki tomon ham shartnomani bekor qilishni istashgan.
2014 yilda germaniyalik mutaxassis Berti Fogtsning o‘rniga kelgan Prosinechkiga milliy jamoani jahon chempionatiga olib chiqish vazifasi yuklatilgandi.
Biroq ozarbayjonliklar Rossiya–2018 mundiali saralash o‘yinlarida atigi 10 ochko to‘plab, guruhda bor-yo‘g‘i 5-o‘rinni egallashdi.
Ayni paytda Robert Prosinechkini Yevropaning bir nechta klublari ishga chaqirmoqda. Ular orasida Turkiyaning “Bursaspor” jamoasi aniq taklif bilan chiqqan.
Shuningdek, bugun, 31 oktyabr kuni Serbiya terma jamoasini mundialga olib chiqqan murabbiy Slavolyub Muslin o‘z o‘rnini tark etdi.
Taxminlarga ko‘ra, Robert Prosinechki murabbiylik faoliyatini aynan Serbiya terma jamoasida ham davom ettirishi mumkin ekan.
Eslatib o‘tamiz, avvalroq O‘zbekiston futbol federasiyasi milliy terma jamoa bosh murabbiyi Samvel Babayanni o‘z vazifasidan ozod etib, murabbiylar shtabini butunlay tarqatib yuborgandi.
Endi esa, shartli ravishda, Samvel Babayanning “izdoshlari” — Robert Prosinechki hamda Slavolyub Muslinlar ham o‘z vazifalaridan ozod etildi.
Akmalxon Eshonxonov
