Ispaniya chempionatining 11-turi doirasida «Real» o‘z maydonida «Las-Palmas»ni qabul qilib, yirik hisobda g‘alaba qozondi.

Mehmonlar to‘pni yaxshi nazorat qilib, madridliklarga muammo yaratishga harakat qilishdi. Ammo mahoratli futbolchilardan tashkil topgan "Qirollik klubi"ning ochko yo‘qotishga haqi qolmagandi. Zidan shogirdlari o‘zlari yaratgan imkoniyatlardan samarali foydalanib, ketma-ket ikkita mag‘lubiyatdan keyin g‘alaba qozonishdi.

Birinchi bo‘lim tugashiga yaqin Kazemiro burchakdan yetkazilgan uzatmani bosh bilan darvozaga joylagan bo‘lsa, ikkinchi bo‘lim boshida Asensioning olis masofadan yo‘llagan juda kuchli zarbasi oldida "Las-Palmas" darvozaboni ojiz qoldi. O‘yin tugashiga 16 daqiqa qolganida Isko yakuniy hisobni o‘rnatdi.

Ushbu g‘alabadan keyin "Real" o‘z ochkosini 23taga yetkazib, "Atletiko" bilan birga 3 va 4-o‘rinlarni egallab turishibdi.

Ispaniya La ligasi, 11-tur
Real Madrid – Las-Palmas 3:0 (1:0, 2:0)
Gollar: 1:0 – 41 Kazemiro, 2:0 – 56 Asensio, 3:0 – 74 Isko.
Real Madrid – Kasilya, Nacho, Valyexo, Ramos, Marselo, Kroos (Sebalyos, 78), Kazemiro (Lyorente, 68), Isko, Asensio, Ronaldu, Benzema (Vaskes, 75).
Las-Palmas – Lisoain, Masedo, Ximo Navarro, Lemos, Bigas, Kastelyano, Gomes (Remi, 64), Kastelyano, Akvilani (Santana, 83), Kalyeri, Vitolo.
Ogohlantirishlar: Isko (45), Kroos (64), Ximo Navarro (79).