Ispaniya terma jamoasi (2000-2010) hamda “Barselona” (1999-2014) klubi safida ko‘p yillar davomida to‘p tepgan mohir himoyachi Karles Puyol O‘zbekistonga yetib keldi.  9 noyabr kuni (soat 02:00 da) Islom Karimov nomidagi Toshkent Xalqaro AYEroportida o‘nlab futbol muxlislari, jumladan, yurtimizdagi “Barsamaniya” fan-klubi a’zolari yig‘ilishdi va o‘z sevimli futbolchilarini olqishlar bilan kutib olishdi.

Eslatib o‘tamiz, Karles Puyolning yurtimizga tashrifi FIFA prezidenti Janni Infantino tomonidan uyushtirilayotgan bo‘lib, bu orqali FIFA prezidenti O‘zbekiston Futbol Federasiyasi tomonidan yurtimizda futbolni yanada rivojlantirish maqsadida amalga oshirilayotgan katta hajmdagi chora-tadbirlarni qo‘llab-quvvatlash va futbolning ommaviyligini oshirishga hissa qo‘shishni maqsad qilgan.

Karles Puyol tashrifi davomida yurtimizdagi futbol akademiyalari tarbiyalanuvchilari uchun master-klasslar o‘tkazib beradi, shuningdek, Oliy liga 28-tur doirasida bo‘lib o‘tadigan “Paxtakor” va “Olmaliq” jamoalari o‘rtasidagi o‘yinni bevosita “Paxtakor” stadionidan turib tomosha qilib boradi.