Shotlandiyaning “Falkirk” klubi hujumchisi Kevin Oxara “Danfermlin” yarim himoyachisi Din Shilsning bir ko‘zidan ayrilganini yuziga solib, haqorat qilgani uchun sakkiz o‘yinga chetlatildi.
Din Shils 2006 yilda kasalligi tufayli bir ko‘zini operasiya yordamida oldirib tashlagandi. Shils sakkiz yoshida ko‘zini jarohatlab olgan va ko‘rish imkonidan mahrum bo‘lgandi. Shifokorlar esa keyinchalik uning ko‘zini davolab bo‘lmasligi, eng yaxshi yo‘li uni olib tashlash ekanligini aytishgandi.
“Danfermlin” va “Falkirk” o‘rtasidagi o‘yinda Shils raqib futbolchisi Jo MakKi bilan janjallashib qolgani oqibatida maydondan chetlatildi. Ana shu paytda esa “Falkirk”ning zaxira futbolchisi Kevin Oxara Shilsning bir ko‘zidan ayrilganini yuziga solib, haqorat qildi. Bosh hakam esa mazkur holatni bayonnomasiga kiritib qo‘ydi. Oqibatda Shotlandiya futbol assosiasiyasi Oxarani raqibini haqorat qilgani uchun 8 o‘yinga chetlatdi.
