Шотландиянинг “Фалкирк” клуби ҳужумчиси Кевин Охара “Данфермлин” ярим ҳимоячиси Дин Шилснинг бир кўзидан айрилганини юзига солиб, ҳақорат қилгани учун саккиз ўйинга четлатилди.
Дин Шилс 2006 йилда касаллиги туфайли бир кўзини операция ёрдамида олдириб ташлаганди. Шилс саккиз ёшида кўзини жароҳатлаб олган ва кўриш имконидан маҳрум бўлганди. Шифокорлар эса кейинчалик унинг кўзини даволаб бўлмаслиги, энг яхши йўли уни олиб ташлаш эканлигини айтишганди.
“Данфермлин” ва “Фалкирк” ўртасидаги ўйинда Шилс рақиб футболчиси Жо МакКи билан жанжаллашиб қолгани оқибатида майдондан четлатилди. Ана шу пайтда эса “Фалкирк”нинг захира футболчиси Кевин Охара Шилснинг бир кўзидан айрилганини юзига солиб, ҳақорат қилди. Бош ҳакам эса мазкур ҳолатни баённомасига киритиб қўйди. Оқибатда Шотландия футбол ассоциацияси Охарани рақибини ҳақорат қилгани учун 8 ўйинга четлатди.
