Italiya terma jamoasining sobiq futbolchisi Andrea Pirlo JCH-2018 o‘tish o‘yini doirasida Shvesiyaga qarshi bahsdagi mag‘lubiyatdan so‘ng o‘z fikrlari bilan o‘rtoqlashdi.

«Men yanada hujumkorroq taktika tanlagan bo‘lardim va Lorenso Insinyega ko‘proq joy yaratish uchun 4-3-3 uslubida o‘ynashni afzal ko‘rgan bo‘lardim. Biz ikkita hujumchi bilan harakat qilganimiz sabab, maydon markazida juda ko‘p to‘p yo‘qotdik. Qanotlarga ko‘proq e’tibor qaratish lozim.

Javob o‘yinida bo‘sh hudud topish ancha qiyinlashadi, Shvesiya yopiq o‘yin ko‘rsatadi va chuqurroq himoyalanadi. Bunday himoyani esa tezkor to‘p uzatishlar orqali yorib o‘tish mumkin.

Qanday qilib bo‘lmasin gol urib olishimiz kerak, ammo o‘yin sifati ham shunga yarasha yuqori bo‘lmog‘i lozim. Bosim juda yuqori bo‘ladi, biroq javob uchrashuvi – bu butkul boshqa o‘yin», — deydi Pirlo.