Futbol olamida shunday yulduzlar ham borki, ularni tushunish juda qiyin: bir qarasangiz, yorqin o‘yinlari bilan dilingizni rom etishadi, lekin ayni kerakli pallada hafsalangizni pir qilishadi.
Sosser.ru saytining quyidagi maqolasi ana shunday futbolchilar haqida.
Karim Benzema, «Real»
Ajoyib futbolchi va noshud mergan
Yaqinda Zidanning vatandoshi va eng yaqin do‘sti bo‘lmish noaniq zarbalar ustasi «Real» bilan yangi shartnomani imzolashga erishdi. Albatta, sermahsul va taniqli hujumchining yuksak mahoratiga «Qirollik klubi»dagilar shubha qilmaydilar.
Karim chindan ham ishonchli to‘p suradi, jamoaga naf keltiradi, muxlislariga lazzat baxsh etadi, professionallik qoidalariga amal qilishga intiladi. To‘g‘ri, bir necha kilogramm vazn tashlashni jasorat deb bo‘lmasada, o‘ziga nisbatan talabchanlik belgisi sifatida e’tirof etish mumkin.
Ammo yangi shartnomada Benzemaga belgilangan bahodan yoqa ushlamaslikning iloji yo‘q - 2021 yilga qadar 29 yoshli hujumchini o‘z safiga qo‘shib olmoqchi bo‘lgan jamoa «Qirollik klubi»ga 1 mlrd. yevro to‘lashi shart! Ha, aql bovar qilmas, baho.
Mesut Ozil, «Arsenal»
Yetuk pleymeyker va «toshbaqa» yo‘lovchi
«To‘pchilar»ning germaniyalik yarim himoyachisi oliftagarchilik va takabburlik bobida Andrey Arshavindan ham o‘tib ketdi. Londonning tungi klublari bo‘ylab uyushtirilgan sayohatlardan toliqqan rossiyalik hujumchi horg‘in harakatlari va himoyachilarga yordam berishdan bosh tortishi bilan jamoadoshlarining asabiga tegardi.
U hech qachon qaysidir jamoadoshiga qo‘lini «bigiz» qilib, qayerda to‘p surish kerakligi haqida buyruq bermagandi. Germaniyalik jahon chempioni esa shunday qilishga jazm etdi - o‘zi o‘rnidan jilmagan holda jamoadoshlariga to‘p ortidan quvishni amr etdi. Ha, aniq va samarali utazmalar bo‘yicha Mesut ajoyib ko‘rsatkichlarni qayd etmoqda.
Biroq o‘yin qoidalarini tez-tez buzgani bois, maydonni barvaqt tark etishi ham haqiqat. Vaholanki, ozchilik bilan to‘p surishga hatto eng kuchli jamoa ham dosh bera olmaydi. Boz ustiga, «Arsenal» hozirda kuchlilar qatoriga ko‘tarila olmayapti. Arsen Venger shogirdlari orasida Ozil yagona qoidabuzar emas.
Arda Turon, «Barselona»
Saviyali xavbek va o‘jar hukmdor
Qariyalarga qo‘l ko‘tarish - pastkashlik. Arda esa yashil maydonda ham tajovuzkorligini tez-tez namoyish etib turadi. O‘zini Otaturkning futboldagi vorisi deb hisoblaydi. Ana shu takabburligi ta’sirida 60 yoshli jurnalistga qo‘l ko‘targan. Oqibatda samolyotdagi odobsizligi uchun terma jamoadan chetlatildi.
To‘g‘ri, Mircha Lucheskuning ishonchi evaziga faoliyatini davom ettirishga ega bo‘ldi. Biroq murabbiy Ardaga doimo qo‘z-quloq bo‘lib turolmaydi-ku? Qo‘shimchasiga Turonning «Barselona»dagi mavqei ham talab darajasida emas - jarohat tufayli maydonga tusholmayapti. Ayni payt asosiy tarkibdan joy olishdan ko‘ra, biror-bir Xitoy klubiga o‘tib ketishga yaqin turibdi.
Chunki jarohatdan avval ham ahyon-ahyonda maydonda ko‘rinish berayotgandi. Hatto Usmon Dembelening jarohatlanishi ham Turonga yordam berolmadi, mutasaddilar mahalliy yoshlarga ishonch bildirishni ma’qul ko‘rishdi. Jizzaki Arda bilan murosa qilish juda qiyin. Agarda u Qoradeniz kabi intizomli professional bo‘lganida, allaqachon mashhur yulduzlar safidan joy olardi.
Aleksis SANCHES, «Arsenal»
Ajoyib hujumchi, ammo hasadgo‘y baqaloq
