Mavsumning so‘nggi ikki turiga tayyorgarlik ko‘rayotgan “Metallurg” futbolchilari bugun poytaxtimizdagi JAR stadionida O‘zbekiston U-23 terma jamoasiga qarshi nazorat uchrashuvini o‘tkazadi.

O‘yin soat 15:00 da boshlanadi. Mazkur uchrashuv futbolchilarimiz uchun ajoyib amaliyot vazifasini o‘tab beradi. Zero, raqiblardan farqli o‘laroq “Metallurg” FK oxirgi turni o‘tkazib yubordi.

Shu boisdan ham bu o‘yin futbolchilarning jismoniy, funksional hamda ruhiy holatini bilib olish uchun muhim ahamiyat kasb etadi.

Shu narsani aytib o‘tish kerak, O‘zbekiston U-23 termasi 2018 yilning yanvar oyida Xitoyda bo‘lib o‘tadigan Osiyo chempionati final raundiga tayyorgarlik ko‘rayapti. Qur’a natijasiga ko‘ra, Ravshan Haydarov jamoasi “A” guruhida Xitoy, Qatar hamda Ummon terma jamoalariga qarshi maydonga chiqadi. Navbatdagi o‘quv-mashg‘ulot yig‘inini o‘tkazayotgan O‘zbekiston U-23 terma jamoasi uchun “Metallurg”ga qarshi nazorat o‘yini ham foydali bo‘lishi shubhasiz.

O‘zbekiston U-23 terma jamoasining bu galgi yig‘iniga 23 nafar futbolchi jalb etilgan. Ular quyidagi futbolchilardir:

Darvozabonlar: Dilshod Hamroyev (“Navbahor”), Botirali Ergashev (“Paxtakor”), Rahimjon Davronov (“Mash’al”);

Himoyachilar: Doston Tursunov (“Neftchi”), Husniddin G‘ofurov (“Neftchi”), Abbosjon Otaxonov (“Navbahor”), Hojiakbar Alijonov (“Paxtakor”), Doniyor Narzullayev (“Nasaf”), Avaz Mamatxo‘jayev (“Qo‘qon-1912”), Sherzod Nasrullayev (“Nasaf”), Oybek Rustamov (“Qo‘qon-1912”);

Yarim himoyachilar: Jahongir Ahmadov (“Paxtakor”), Sharof Muhitdinov (“Nasaf”), Xurshid G‘iyosov (“Bunyodkor”), Mirjamol Qosimov (“Bunyodkor”), Suhrob Nurulloyev (“Paxtakor”), Abdujamol Isroilov (“Neftchi”), Islom Rashidxonov (“Nasaf”), Javohir Qahramonov (“Buxoro”);

Hujumchilar: Azizbek Amanov (“Lokomotiv”), Zabihillo O‘rinboyev (“Paxtakor”), Bobir Abdixoliqov (“Nasaf”), Andrey Sidorov (“Qo‘qon-1912”).