Мавсумнинг сўнгги икки турига тайёргарлик кўраётган “Металлург” футболчилари бугун пойтахтимиздаги ЖАР стадионида Ўзбекистон U-23 терма жамоасига қарши назорат учрашувини ўтказади.

Ўйин соат 15:00 да бошланади. Мазкур учрашув футболчиларимиз учун ажойиб амалиёт вазифасини ўтаб беради. Зеро, рақиблардан фарқли ўлароқ “Металлург” ФК охирги турни ўтказиб юборди.

Шу боисдан ҳам бу ўйин футболчиларнинг жисмоний, функционал ҳамда руҳий ҳолатини билиб олиш учун муҳим аҳамият касб этади.

Шу нарсани айтиб ўтиш керак, Ўзбекистон U-23 термаси 2018 йилнинг январь ойида Хитойда бўлиб ўтадиган Осиё чемпионати финал раундига тайёргарлик кўраяпти. Қуръа натижасига кўра, Равшан Ҳайдаров жамоаси “А” гуруҳида Хитой, Қатар ҳамда Уммон терма жамоаларига қарши майдонга чиқади. Навбатдаги ўқув-машғулот йиғинини ўтказаётган Ўзбекистон U-23 терма жамоаси учун “Металлург”га қарши назорат ўйини ҳам фойдали бўлиши шубҳасиз.

Ўзбекистон U-23 терма жамоасининг бу галги йиғинига 23 нафар футболчи жалб этилган. Улар қуйидаги футболчилардир:

Дарвозабонлар: Дилшод Ҳамроев (“Навбаҳор”), Ботирали Эргашев (“Пахтакор”), Раҳимжон Давронов (“Машъал”);

Ҳимоячилар: Достон Турсунов (“Нефтчи”), Ҳусниддин Ғофуров (“Нефтчи”), Аббосжон Отахонов (“Навбаҳор”), Ҳожиакбар Алижонов (“Пахтакор”), Дониёр Нарзуллаев (“Насаф”), Аваз Маматхўжаев (“Қўқон-1912”), Шерзод Насруллаев (“Насаф”), Ойбек Рустамов (“Қўқон-1912”);

Ярим ҳимоячилар: Жаҳонгир Аҳмадов (“Пахтакор”), Шароф Муҳитдинов (“Насаф”), Хуршид Ғиёсов (“Бунёдкор”), Миржамол Қосимов (“Бунёдкор”), Суҳроб Нуруллоев (“Пахтакор”), Абдужамол Исроилов (“Нефтчи”), Ислом Рашидхонов (“Насаф”), Жавоҳир Қаҳрамонов (“Бухоро”);

Ҳужумчилар: Азизбек Аманов (“Локомотив”), Забиҳилло Ўринбоев (“Пахтакор”), Бобир Абдихолиқов (“Насаф”), Андрей Сидоров (“Қўқон-1912”).