Oliy Liga 29-turining Samarqandda o‘tadigan «Dinamo» - «Lokomotiv» uchrashuvi barchaning diqqat e’tiborida turibdi. Ushbu bahsdagi g‘alaba har ikki jamoa uchun juda muhim sanaladi.
O‘YIN HAQIDA: FAQAT UCH OCHKO UCHUN «JANG»!
«Dinamo» - «Lokomotiv» ishtirokidagi ushbu bahs har ikki tomon uchun juda muhim sanaladi. PFL qaroridan keyin, ligada qolish uchun kurash olib borayotgan Samarqand jamoasi uchun so‘nggi ikki turda ochko olishi o‘ta muhimdir. Hozirda 32 ochko bilan 12-o‘rinda borayotgan «Dinamo» 11-o‘rinda 33 ochko jamg‘argan «Qizilqum»ni ta’qib etmoqda. Shu bois «Dinamo»ni g‘alabadan boshqa natija qoniqtirmaydi.
Bu borada «Lokomotiv»da ham g‘alabaning qadri juda baland. «Temiryo‘lchilar» Samarqandda uch ochko ilinjida kelishmoqda. Sababi aynan «Dinamo» bilan o‘yindagi g‘alaba Toshkent klubiga ketma-ket ikkinchi chempionlikni taqdim etishi mumkin. Shunday ekan, «Lokomotiv» o‘tgan yili kubok finalida Samarqandda g‘oliblikni qo‘lga kiritgani kabi, bu safar ham ko‘xna shaharga sovrin maqsadida kelayotgani sir emas. Ikki tomon uchun ham ochko juda zarurligini inobatga olsak, Samarqanddagi o‘yin shiddatli va murosasiz kechishini taxmin qilish mumkin.
«Dinamo»ning Oliy Liga so‘nggi besh turidagi o‘yini:
24-tur: Dinamo - Olmaliq - 1:0
25-tur: Nasaf – Dinamo – 3:0
26-tur: Dinamo – Obod - +/-
27-tur: Qizilqum – Dinamo – 1:0
28-tur: Dinamo – Neftchi – 1:0
29-tur: Dinamo - Lokomotiv
30-tur: Mash’al - Dinamo
«Lokomotiv»ning Oliy Liga so‘nggi besh turidagi o‘yini:
24-tur: Lokomotiv – Navbahor – 2:0
25-tur: Qizilqum – Lokomotiv – 0:2
26-tur: Lokomotiv – Qo‘qon-1912 - 3:0
27-tur: Neftchi – Lokomotiv – 0:0
28-tur: Lokomotiv – Buxoro – 2:0
29-tur: Dinamo - Lokomotiv
30-tur: Lokomotiv – Bunyodkor.
O‘YIN ASIMOVGA ISHONIB TOPSHIRILDI
Samarqandda o‘tadigan turning e’tiborli o‘yinlaridan biri bo‘lmish «Dinamo» - «Lokomotiv» uchrashuvini boshqarib borish Aziz Asimov boshchiligidagi hakamlar guruhiga topshirilgan. O‘yin nazoratchisi Arslon Hotamov.
Oliy Liga, 29-tur
19 noyabr (yakshanba)
«Dinamo» (Samarqand) – «Lokomotiv» (Toshkent)
Hakamlar: A. Asimov (Toshkent), A. Snetkov (Toshkent vil.), A. Sapenko (Toshkent vil.), N. Qosimov (Qarshi).
Nazoratchi: A. Xotamov (Toshkent)
PFL vakili: V. Lyotkin.
O‘ZARO O‘YINLAR: USTUNLIK «DINAMO»DA
“Dinamo” va “Lokomotiv” Oliy Ligada 23 marta to‘qnash kelishgan. “Dinamo” 10 ta o‘yinda g‘olib bo‘lgan, 3 ta o‘yin durang hisobida yakunlangan. “Lokomotiv” ham ushbu raqibni hozirga qadar 10 marta mag‘lub eta olgan. To‘plar nisbatida esa ustunlik “Dinamo” tomonida - 33:32. O‘zaro o‘yinlarda “Dinamo” 33, “Lokomotiv” esa 33 ochkoni qo‘lga kiritgan.
“Lokomotiv”ning o‘zaro o‘yinlarda qozongan eng yirik g‘alabasi – 4:0 ga teng. “Dinamo”da bu ko‘rsatkich yanada kattaroq – 5:0. 2009 yilgi bahsda Azamat Abduraimov boshchiligidagi «Dinamo» Ilhom Yunusov, Devid Oniya, Andrey Akopyans, Erkin Boydullayev, Bahodir Nasimovlarning Filimonov darvozasiga kiritgan gollari evaziga «Loko»ni 5:0 hisobida mag‘lub etishgan.
Birinchi davrada o‘tgan bahsda «Lokomotiv» «Dinamo» ustidan 2:0 hisobida zafar quchgan. O‘shanda Ikrom Aliboyev va Murod Bobojonovlarning gollari «Temiryo‘lchilar»ga g‘alaba keltirgan. Shu kuni «Dinamo»da gol urish uchun juda ko‘p imkoniyat yuzaga kelgan bo‘lsada, vaziyatlardan unumli foydalanilmagandi.
«Dinamo» so‘nggi marta «Lokomotiv»ni Samarqandda 2013 yilda mag‘lub etgan. O‘shanda San’at Shixov tomonidan 90+3-daqiqada kiritilgan gol samarqandliklarga g‘alaba keltirgan.
Samarqanddagi o‘zaro so‘nggi olti uchrashuv:
16.04.2015 «Dinamo» - «Lokomotiv» 0:1
06.06.2014 «Dinamo» - «Lokomotiv» 1:2
29.09.2013 «Dinamo» - «Lokomotiv» 1:0
30.06.2012 «Dinamo» - «Lokomotiv» 0:1
17.04.2010 «Dinamo» - «Lokomotiv» 2:0
20.06.2009 «Dinamo» - «Lokomotiv» 5:0
ESKI TANISHLAR
«Dinamo» - «Lokomotiv» uchrashuvida bir qator eski tanishlar ro‘baro‘ kelishadi. Jumladan, «Dinamo» safidagi Farhod Tojiyev, Temur Jo‘rayevlar o‘z vaqtida «Lokomotiv» safida to‘p surishgan. Farhod poytaxt klubi safida chempionat to‘purarlaridan biriga aylangandi.
«Lokomotiv» tarkibidagi himoyachi Salim Mustafoyev Samarqand futboli tarbiyalanuvchisi sanalib, aynan «Dinamo» safidan «Loko»ga yo‘l olgandi. Shuningdek, hozirda «Loko» posboni bo‘lgan Ignatiy Nesterov ham Oliy Ligadagi debyut o‘yinlarini aynan «Dinamo» safida o‘tkazgan. Qolaversa, jamoa yarimhimoyachisi Sadriddin Abdullayev 2007 yilda «Dinamo» safida yaxshi mavsumni o‘tkazib, «Dinamo»ning o‘sha mavsumni 5-o‘rinda yakunlashiga katta yordam bergan.
UCHRASHUVGA MARHAMAT!
Eslatib o‘tamiz, «Dinamo» - «Lokomotiv» uchrashuvi chiptalari stadion kassalarida sotilmoqda. O‘yin yakshanba kuni soat 14:00 da boshlanadi.
Oliy Liga. 29-tur.
19 noyabr (yakshanba)
«DINAMO» - «LOKOMOTIV»
Uchrashuv boshlanish vaqti: 14:00.
«Dinamo» klubi matbuot xizmati.
