Osiyo Futbol Konfederasiyasi Prezidenti Shayx Salmon bin Ibrohim al-Xalifa 3 dekabr kuni rasmiy tashrif bilan yurtimizga keldi.

Yuqori martabali mehmonni “Toshkent Xalqaro Aeroporti”da O‘zbekiston Futbol Federasiyasi Prezidenti Umid Ahmadjonov, Jismoniy tarbiya va sport davlat qo‘mitasi raisi Rustam Qurbonov, federasiya mas’ullari va ommaviy axborot vositalari xodimlari kutib olishdi. 

Tashrif doirasida OFK prezidenti bir qator rasmiy uchrashuvlar o‘tkazishi ko‘zda tutilgan bo‘lib, ular davomida Shayx Salmon bin Ibrohim al-Xalifa yurtimizda futbolni rivojlantirish va yoshlar orasida yanada ommalashtirish maqsadida amalga oshirilayotgan ishlar bilan yaqindan tanishadi.

Shuningdek, konfederasiya prezidenti 4 dekabr kuni “Bunyodkor” – “Lokomotiv” o‘rtasida bo‘lib o‘tadigan O‘zbekiston Kubogi final uchrashuvini bevosita stadiondan kuzatib borib, g‘olib jamoaga Kubokni topshiradi.

OFK prezidentining yurtimizga tashrifi O‘zbekiston futbol federasiyasining Osiyo Futbol Konfederasiyasi bilan hamkorlikdagi loyihalarining yanada rivojlanishiga xizmat qiladi.